Expediente: IN407A 2023/257-1.

Promotora: UFD Distribución Electricidad, S.A.

Denominación do proxecto: substitución de CTC Cortés-15CV33.

Concello: Ortigueira.

Feitos:

1. O día 12 de maio de 2023, a empresa promotora solicitou a autorización administrativa previa e a autorización administrativa de construción do proxecto de execución da dita instalación de distribución eléctrica, co obxecto de substituír un CT caseta alta tipo rural polo fin da súa vida útil.

Ao abeiro do artigo 123 do Real decreto 1955/2000, achegan o proxecto de execución denominado substitución de CTC Cortés-15CV33, asinado o día 14 de abril de 2023 por Victoriano González Lemos, enxeñeiro técnico industrial eléctrico, nº colexiado 2.980 de Vigo.

2. O proxecto non se someteu ao trámite de información pública, segundo o artigo 50 da Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Consonte o artigo 127 do Real decreto 1955/2000, do 1 de decembro, solicitouse o informe preceptivo ás distintas entidades afectadas: Concello de Ortigueira, Patrimonio Natural e ADIF. A empresa promotora manifestou a súa conformidade cos informes presentados no prazo outorgado para ese efecto.

4. O día 29 de abril de 2024 emitiuse o informe técnico.

Consideracións legais e técnicas:

Primeira. O director territorial é competente para resolver este expediente segundo o Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia; o artigo 41 do Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo), modificado polo Decreto 49/2023, do 19 de maio (DOG núm. 98, do 25 de maio), consonte coa disposición adicional décimo segunda e a disposición transitoria primeira do Decreto 49/2024, do 22 de abril, polo que se fixa a estrutura orgánica das consellerías da Xunta de Galicia (DOG núm. 81, do 24 de abril).

Segunda. Lexislación de aplicación.

– Lei 24/2013, do 26 de decembro, do sector eléctrico.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Real decreto 842/2002, do 2 de agosto, polo que se aproba o Regulamento electrotécnico para baixa tensión.

– Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

Terceira. Características técnicas.

As instalacións de alta tensión obxecto deste expediente están situadas no lugar de Cortés, parroquia de Santa María de Luia, no concello de Ortigueira, e as súas características técnicas son as seguintes:

Proxéctase un centro de transformación tipo intemperie de 100 kVA de potencia e relación de transformación 20/0,4 kV, en novo apoio por instalar de celosía e características C2000/14 na parcela actual que ocupa o edificio da caseta do centro de transformación de Cortés alimentado pola LMT aérea MEA802 denominada Ortigueira 2 con expediente IN407 2009/453-1 en cable aluminio nu LA-56.

Substitución do apoio de formigón actual con código matrícula BA0PDJTV//30-3 por un novo apoio metálico de celosía de características C3000/16 con dobre cruceta H 35, cadeas de amarre e instalación de interruptor seccionador con portafusibles tipo XS cara ao novo CTI. Substitución do de 11 m de condutor actual en LA-56 por un novo para adecuar a obra á posición do novo centro de transformación e retensado do actual entre os apoios nº 30-2 e nº 30-3.

Na actual derivación desde este apoio da LMTA cara ao centro de transformación Loureiros-15AGB8 expediente 51790, substitúense o seccionamento punto de manobra actual PM 15H585 por un cortacircuítos fusibles de expulsión tipo XS novo por instalar no apoio 30-4, cambio de cruceta actual a H35 e substitución do condutor LA-56 nun tramo de 60 metros entre o apoio nº 30-3 ao nº 30-4 e retensado do van seguinte.

Cuarta. No expediente consta un informe favorable dos servizos técnicos desta dirección territorial.

De acordo con todo o exposto,

RESOLVO:

1. Conceder a autorización administrativa previa e a autorización administrativa de construción da dita instalación de distribución eléctrica.

2. A instalación executarase no prazo dun ano, contado a partir do día seguinte ao da publicación desta resolución no Diario Oficial de Galicia.

3. Para a posta en explotación da instalación autorizada, deberá achegar ante esta dirección territorial unha solicitude coa cal xuntará a seguinte documentación:

– As declaracións de conformidade relativas ao material ou equipamento, e as certificacións ou homologacións, se procede.

– Un certificado do/da director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas oportunas na montaxe da instalación e posta a punto.

– Planimetría as built da instalación eléctrica en formato shape.

4. Esta aprobación outórgase sen prexuízo doutras que sexan de aplicación segundo a lexislación vixente, en especial, no relativo á ordenación do territorio e ao ambiente.

Contra esta resolución, que non é definitiva en vía administrativa, poderase interpor recurso de alzada perante a conselleira de Economía e Industria no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren pertinente.

Mediante este documento notifícaselles aos interesados esta resolución, segundo o exixido no artigo 40.1 da dita Lei 39/2015.

A Coruña, 10 de maio de 2024

Isidoro Martínez Arca
Director territorial da Coruña