Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáse publicidade do acordo acadado polo Xurado Provincial de Clasificación de Montes Veciñais en Man Común de Pontevedra, na sesión que tivo lugar o 28 de febreiro de 2024, con respecto á revisión do esbozo e elaboración da cartografía actualizada do monte veciñal denominado Os Codesás, da Comunidade de Montes Veciñais en Man Común dos Codesás, no concello de Forcarei (expediente RE23003).
O 16.11.2023 o Servizo de Montes desta xefatura territorial emitiu o seguinte informe:
«Feitos:
Primeiro. O 20.6.2023, con entrada no rexistro electrónico da Xunta de Galicia número 2023/1821885, a Comunidade de Montes Veciñais en Man Común (en diante, CMVMC) dos Codesás, no concello de Forcarei, solicita a revisión do esbozo parcial do monte Os Codesás (ID 2710) para poder continuar coa tramitación de deslindamento que solicitou coa CMVMC de Soutelo, no concello de Forcarei (DC23001). A dita solicitude deu lugar á apertura do expediente RE23003.
Constan no expediente:
– Memoria técnica asinada polo enxeñeiro técnico forestal colexiado número 296 do COETFG.
– Certificado do secretario do 18.6.2022, coa conformidade do presidente, da aprobación do deslindamento con Soutelo e o esbozo nas partes afectadas polo deslindamento, na asemblea do mesmo día.
– Cartografía en formato dixital.
Realízase a revisión parcial do esbozo dos Codesás para poder aprobar o deslindamento que a CMVMC de Soutelo ten coa CMVMC dos Codesás, xa que segundo a memoria e a cartografía presentada esta parcela está desprazada.
Tomáronse para esta revisión as parcelas catastrais que pertencen ao monte e a descrición dos límites que se nomean na carpeta ficha.
No seguinte cadro aparecen as parcelas catastrais e a superficie afectada por esta revisión parcial, que como se pode comprobar coincide exactamente coa catastral, excepto no camiño (36018A05109001) e na parcela 36018A25400963, xa que, segundo se explica na memoria, a parte norte son predios particulares definidos mediante valado.
Parcela catastral |
Sup. catastral (ha) |
Afección (ha) |
36018A05109001 |
0,13 |
0,09 |
36018A25400963 |
2,89 |
1,01 |
36018A25400964 |
1,41 |
1,41 |
36018A25400966 |
1,77 |
1,77 |
36018A25400967 |
0,15 |
0,15 |
36018A25400968 |
0,40 |
0,4 |
36018A25400965 |
0,19 |
0,19 |
Segundo. Realizouse unha revisión parcial do monte con ID 2710, clasificado o 25.5.1976, cunha superficie total de 26 ha, que queda despois desta revisión parcial cunha superficie de 24,78 ha.
O monte con ID 2710, segundo a clasificación, consta de dúas parcelas: unha cunha superficie de 20 ha, que non se revisa, e outra de 6 ha, obxecto desta revisión.
Na parcela revisada modifícase tanto a superficie de 5,01 ha (fronte a 6 ha) como a situación (a parcela realmente encóntrase máis ao norte e linda co resto do monte).
A descrición de todo o monte dos Codesás, segundo o indicado na memoria técnica, queda definida do seguinte xeito:
Monte: Os Codesás.
Superficie: 24,78 ha.
Linde norte: MVMC de Badaolo.
Linde sur e leste: propiedades particulares.
Linde oeste: MVMC de Soutelo e MVMC de Sanguñedo.
Segundo os datos do Sistema rexistral forestal, non consta superficie de xestión pública nin actos de disposición no MVMC que modifiquen a superficie de clasificación. Tampouco dispón dun instrumento de ordenación inscrito no Rexistro Público de Montes Ordenados de Galicia.
Terceiro. O 2.10.2023, o Xurado do MVMC de Pontevedra acorda solicitarlle ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC Os Codesás (Forcarei), expediente RE23003, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, e axustaranse e completaranse con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.
2. Para estes efectos, o Xurado Provincial de Montes Veciñais en Man Común, de oficio ou por instancia de parte, poderá solicitarlle á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no Rexistro da Propiedade a favor de persoas físicas ou xurídicas distintas á Comunidade Veciñal de Montes.
3. Unha vez aceptada a proposta polo Xurado, porase en coñecemento da comunidade propietaria e publicarase no Diario Oficial de Galicia para o resto de posibles persoas interesadas.
4. Unha vez aceptada a revisión, poderase realizar a marcaxe dos montes veciñais, que en todo caso se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, porase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade das persoas interesadas de acudiren á vía xurisdicional civil, por ser esta a competente para dirimir tal controversia.
Segunda. A revisión parcial do esbozo do monte Os Codesás, proposta polo Servizo de Montes, é a presentada pola CMVMC dos Codesás (Forcarei), e queda definido consonte os datos reflectidos no feito segundo, e a planimetría que consta no expediente».
Vista a proposta de revisión presentada polo Servizo de Montes sobre a adaptación do esbozo do monte veciñal denominado Os Codesás, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión parcial do esbozo do monte veciñal Os Codesás, clasificado a prol da CMVMC dos Codesás (Forcarei), segundo a proposta do Servizo de Montes e a planimetría elaborada por el.
Pontevedra, 29 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra