Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada dos montes veciñais denominados «montes de Budiño» da Comunidade de Montes Veciñais en Man Común de Budiño, no concello de Salceda de Caselas (expediente RE22023).
O 6.12.2023, o Servizo de Montes desta xefatura territorial emite o seguinte informe:
«Feitos:
Primeiro. O 14.9.2022 e número 2022/2264911, a Comunidade de Montes Veciñais en Man Común (en diante, CMVMC) de Budiño solicita a revisión do esbozo dos montes «montes de Budiño». A dita solicitude deu lugar a apertura do expediente RE22023.
Consta no expediente:
– Proposta para a revisión do esbozo da carpeta ficha do MVMC de Budiño, Salceda de Caselas, Pontevedra. Setembro de 2022. Asinado pola enxeñeira técnica forestal núm. 883 do COETFG e modificada en decembro de 2023.
– Certificado do secretario coa conformidade do presidente da CMVMC de Budiño do 18.6.2023 da aprobación en asemblea do 18.6.2023.
– Cartografía en formato dixital.
Segundo a memoria técnica levouse a cabo un levantamento topográfico das parcelas con GPS de precisión en que se percorreu todo o perímetro con membros da xunta reitora da CMVMC de Budiño e se identificaron muros e marcos que separan os doutras propiedades particulares e MVMC.
Segundo a memoria achegada os «montes de Budiño» quedan descritos como: Seixo Branco, Monte Ameixeira, Chan do Monte e Monte das Pedras.
Segundo. O obxecto da revisión do esbozo é o MVMC dos «montes de Budiño» co ID 3104. A superficie inicial clasificada segundo a Resolución do 5.12.1980 é de 57,00 ha.
Segundo os datos do Sistema rexistral forestal non consta superficie de xestión pública e dispón dun instrumento de ordenación inscrito no Rexistro de Montes Ordenados de Galicia co número 360268 e vixente ata o ano 2031. Consta o expediente do trazado do gasoduto que non se reflexa na proposta remitida pola comunidade.
Terceiro. A superficie total da revisión do esbozo achegada é de 58,59 ha e un perímetro revisado con propietarios particulares de 14,15 m, segundo a proposta de revisión do esbozo achegada e o indicado na memoria técnica queda definido do seguinte xeito:
Nome: montes de Budiño.
Superficie: 58,59 ha.
Linde norte: termo municipal do Porriño.
Linde sur: termo municipal de Tui.
Linde leste: montes de Parderrubias e Soutelo.
Linde oeste: termo municipal do Porriño.
Cuarto. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Budiño (Salceda de Caselas), expediente RE22023, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándoos e completándoos con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.
2. Para estes efectos, o Xurado Provincial de Clasificación de Montes Veciñais en Man Común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no Rexistro da Propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais que, en todo caso, se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo dos montes «montes de Budiño» proposta polo Servizo de Montes é a presentada pola CMVMC de Budiño e queda definido consonte os datos reflectidos no feito terceiro e a documentación achegada».
Vista a proposta de revisión presentada polo Servizo de Montes sobre a adaptación do esbozo dos montes veciñais denominados «montes de Budiño» e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo dos montes veciñais denominados «montes de Budiño» clasificados a prol da CMVMC de Budiño (Salceda de Caselas), segundo a proposta do Servizo de Montes e a planimetría elaborada por este.
Pontevedra, 22 de abril de 2024
Antonio Crespo Iglesias
Presidente do Xurado Provincial de Clasificación de Montes Veciñais
en Man Común de Pontevedra