Unha vez examinado o expediente de solicitude de clasificación da Fundación Amador de Castro con domicilio na rúa Fernando Macías número 31-33, na Coruña.

Feitos:

1. O 11 de decembro de 2023, Marta de Castro Torre, vogal do Padroado da fundación, presentou solicitude de clasificación, declaración de interese galego e a súa correspondente inscrición no Rexistro de Fundacións de Interese Galego.

2. A Fundación Amador de Castro constituírona Rosa Torre Fouz, Susana de Castro Torre, Blanca de Castro Torre e Marta de Castro Torre, mediante escritura pública outorgada o 8 de novembro de 2023, ante o notario da Coruña Juan Cora Guerreiro, co número de protocolo 2.407.

3. A fundación, consonte o artigo 6 dos seus estatutos, ten por obxecto: «contribuír ao benestar xeral e a inclusión social dos nenos e mozos con discapacidade intelectual e dos enfermos de alzhéimer e doutras demencias que causan problemas coa memoria, o pensamento e o comportamento, as súas familias e contorna».

4. O Padroado inicial da Fundación está formado por Rosa Torre Fouz, como presidenta; Blanca de Castro Torre, como vicepresidenta; Susana de Castro Torre e Marta de Castro Torre, como vogais; e María Outeiriño Blanco, como secretaria sen dereito a voto.

5. A Comisión integrada polos secretarios xerais de todas as consellerías eleva ao vicepresidente primeiro e conselleiro de Presidencia, Xustiza e Deportes proposta de clasificación como de interese social da Fundación Amador de Castro, con base nas materias que constitúen o seu obxecto fundacional.

6. Na escritura de constitución consta a identidade dos fundadores, a dotación inicial, os estatutos e a identificación dos membros do Padroado.

7. De conformidade co artigo 51 do Decreto 14/2009, do 21 de xaneiro, polo que se aproba o regulamento de fundacións de interese galego, e segundo proposta da Comisión de Secretarios Xerais, procede a súa clasificación como de interese social e a súa adscrición á Consellería de Política Social e Xuventude.

Consideracións legais:

1. O artigo 34 da Constitución española recoñece o dereito de fundación para fins de interese xeral de acordo coa lei, e o artigo 27.26 do Estatuto de autonomía de Galicia establece competencia exclusiva sobre o réxime das fundacións de interese galego.

2. A escritura de constitución da Fundación contén os datos exixidos na Lei 12/2006, do 1 de decembro, de fundacións de interese galego.

3. Consonte o artigo 7 do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, correspóndelle a esta Vicepresidencia Primeira e Consellería de Presidencia, Xustiza e Deportes, a clasificación da fundación e a adscrición á consellería correspondente, que exercerá as funcións de protectorado.

De conformidade co exposto, e considerando que se cumpren as condicións establecidas pola normativa vixente en materia de fundacións de interese galego, de acordo coa proposta realizada pola Comisión de Secretarios Xerais na súa reunión do día 18 de marzo de 2023.

DISPOÑO:

Clasificar de interese social a Fundación Amador de Castro, e adscribila ao protectorado da Consellería de Política Social e Xuventude.

Contra esta orde, que pon fin á vía administrativa, pode interpoñerse, no prazo de dous meses, recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, consonte o artigo 46.1 da Lei 29/1998, do 13 de xullo, reguladora da xurisdición contencioso-administrativa; poderase interpoñer no prazo dun mes, previamente e con carácter potestativo, recurso de reposición ante o mesmo órgano que ditou o acto, de conformidade co artigo 124 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 12 de abril de 2024

Diego Calvo Pouso
Vicepresidente primeiro e conselleiro de Presidencia,
Xustiza e Deportes