Mediante a Resolución do 27 de novembro de 2023, que foi publicada no DOG núm. 236, do 14 de decembro, establecéronse as bases reguladoras para a concesión de subvencións, en réxime de concorrencia non competitiva, relativas ao Plan Renova o teu vehículo, así como a selección das entidades colaboradoras que participarán na súa xestión, e se procede á convocatoria, mediante tramitación anticipada, para a anualidade 2024 (códigos de procedemento IN421T e IN421U).

Mediante a Resolución do 12 de febreiro de 2024 que foi publicada no DOG núm. 34, do 16 de febreiro, ampliouse o orzamento inicial da convocatoria.

O artigo 2.1 da citada resolución prevé a posibilidade de redistribuír o orzamento se pasado un mes desde a apertura do prazo de solicitudes, nalgunha das epígrafes non se rexistraron solicitudes suficientes para esgotar os fondos dispoñibles e noutra das epígrafes existe listaxe de espera. O prazo de presentación de solicitudes comezou o día 17 de xaneiro e un mes despois non se rexistraron solicitudes suficientes para esgotar os fondos dispoñibles nas epígrafes correspondentes a autónomos ou empresas e, porén, existe listaxe de espera na epígrafe de persoas físicas.

O artigo 31 do Decreto 11/2009, establece que cando a contía total máxima das subvencións convocadas se distribúa entre distintos créditos orzamentarios, a alteración da dita distribución non precisará de nova convocatoria, pero si das modificacións que procedan no expediente de gasto e da publicación nos mesmos medios que a convocatoria.

Por todo o anterior, e dado que nas aplicacións orzamentarias correspondentes existe crédito dispoñible e coa finalidade de incrementar a eficacia administrativa e a eficiencia na asignación de recurso públicos,

RESOLVO:

Primeiro. Redistribuír os fondos destinados ao Plan Renova o teu vehículo modificando a táboa do artigo 2.1 da Resolución do 27 de novembro do 2023 do seguinte xeito:

Tipo de beneficiario	Aplicación orzamentaria	Dotación orzamentaria inicial (€)	Dotación orzamentaria actual (€)	Redistribución (€)	Dotación orzamentaria final (€)
Persoas físicas	09.A3.733A.780.4	2.700.000,00	2.850.000,00	150.000,00	3.000.000,00
Autónomos ou empresas	09.A3.733A.772.2	300.000,00	300.000,00	-150.000,00	150.000,00
Total		3.000.000,00	3.150.000,00	0,00	3.150.000,00

Segundo. A presente modificación, unha vez publicada no Diario Oficial de Galicia, non implicará a modificación do prazo establecido para presentar solicitudes.

Santiago de Compostela, 6 de marzo de 2024

Pablo Fernández Vila
Director do Instituto Enerxético de Galicia