Examinada a solicitude de revisión de esbozo formulada polos representantes do monte veciñal en man común (MVMC) Campo da Gonza, pertencente á Comunidade de Montes Veciñais en Man Común (CMVMC) de Carracedo, Castromao, Corzos e Pradolongo, no concello da Veiga, resultan os seguintes

Feitos:

Primeiro. O 14.2.2023 a CMVMC de Carracedo, Castromao, Corzos e Pradolongo presentou unha solicitude (Rexel núm. 2023/509908) de revisión de esbozo do MVMC de Campo da Gonza, no concello da Veiga.

Coa solicitude achegaron a seguinte documentación:

– Certificación do acordo da Asemblea Xeral do 18.9.2022.

– Memoria e planos.

– Arquivos xeográficos en formato vectorial.

Segundo. O Servizo de Montes da Xefatura Territorial de Ourense emitiu un informe favorable o día 8 de maio de 2023 en relación coa citada solicitude. Neste indícase que o perímetro obxecto de revisión inclúe as partes do perímetro lindeiras con particulares, así como tamén o tramo estremeiro co MVMC de Feixos ou Terrois, pertencente á CMVMC de Corzos.

A superficie do MVMC Campo da Gonza, unha vez revisado o esbozo, sería de 886,56 ha fronte ás 924 ha do acordo de clasificación, o que supón unha redución do 4,0 %.

Tendo en conta o anterior, infórmase favorablemente a revisión do esbozo do MVMC de Campo da Gonza.

Consideracións legais e técnicas:

Único. A Lei 7/2012, do 28 de xuño, de montes de Galicia, na súa disposición transitoria décimo terceira, establece o procedemento de revisión de esbozos de montes veciñais en man común.

De acordo con esta, os esbozos de montes veciñais integrados nun expediente que, pola súa antigüidade non reúnan as características de fiabilidade e precisión que exixen as novas técnicas topográficas poderán ser obxecto de revisión axustándose e completándose con aqueles datos e documentos que se consideren necesarios, en particular, os requiridos para a súa inmatriculación no Rexistro da Propiedade.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 8 de maio de 2023, o Xurado Provincial de Montes Veciñais en Man Común acordou por unanimidade, o día 20 de febreiro de 2024:

Aprobar a proposta de revisión de esbozo do MVMC de Campo da Gonza, pertencente á CMVMC de Carracedo, Castromao, Corzos e Pradolongo, no concello da Veiga.

Ourense, 28 de febreiro de 2024

Luis Jorge Álvarez Ferro
Presidente do Xurado Provincial de Clasificación de Montes Veciñais
en Man Común de Ourense