Examinada a solicitude de deslindamento formulada polos representantes do monte veciñal en man común (MVMC) Portela, Rabazal, Ouzal, Currás, Veiga e Outeiro das Pereiras, pertencente á Comunidade de Montes Veciñais en Man Común (CMVMC) da parroquia de Santa Comba, no concello de Bande, e mais os montes de Fragón, Outeiro e Outeiro D’Arriba, pertencente á CMVMC de Fradalvite, no concello de Lobeira, e entre o monte Portela, Rabazal, Ouzal, Currás, Veiga e Outeiro das Pereiras e o monte Chá, pertencente á Comunidade de Montes Veciñais en Man Común (CMVMC) de Carreiras, Ermille, Chaos e Fradalvite, no concello de Lobeira, resultan os seguintes:

Feitos:

Primeiro. O 29 de setembro de 2022 a CMVMC da parroquia de Santa Comba presentou un escrito (Rexel 2022/2399749) en que solicita a aprobación dun deslindamento coa CMVMC de Fradalvite e coa de Carreiras, Ermille, Chaos e Fradalvite.

Coa solicitude achegaron a seguinte documentación:

– Actas de deslindamento.

– Certificacións dos acordos das respectivas asembleas xerais.

– Memoria e planos.

– Acta de conciliación levantada no Xulgado de Paz de Bande.

Segundo. O informe do Servizo de Montes da Xefatura Territorial de Ourense do 14 de abril de 2023 fai constar que a documentación achegada corresponde ao deslindamento do perímetro estremeiro entre o MVMC Portela, Rabazal, Ouzal, Currás, Veiga e Outeiro das Pereiras, pertencente á CMVMC da parroquia de Santa Comba (T.M. de Bande), e o MVMC Fragón, Outeiro e Outeiro D’Arriba, pertencente á CMVMC de Fradalvite (T.M. de Lobeira), desde o vértice 1 (o situado máis ao oeste) ata o vértice 14 (o situado máis ao leste); doutro lado, revísase a estrema entre o propio MVMC Portela, Rabazal, Ouzal, Currás, Veiga e Outeiro das Pereiras e mais o MVMC Chá, pertencente á CMVMC de Carreiras, Ermille, Chaos e Fradalvite (T.M. de Lobeira), desde o vértice 1 (o situado máis ao oeste) ata o vértice 9 (o situado máis ao leste).

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.

Consideracións legais e técnicas:

Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 14 de abril de 2023, o Xurado Provincial de Clasificación de Montes Veciñais en Man Común acordou por unanimidade o día 11 de decembro de 2023:

Aprobar o acto de conciliación acadado polas xuntas reitoras dos MVMC Portela, Rabazal, Ouzal, Currás, Veiga e Outeiro das Pereiras, pertencente á CMVMC da parroquia de Santa Comba, no concello de Bande, e mais o MVMC Fragón, Outeiro e Outeiro D’Arriba, pertencente á CMVMC de Fradalvite, no concello de Lobeira, e entre o citado MVMC Portela, Rabazal, Ouzal, Currás, Veiga e Outeiro das Pereiras, e mais o MVMC Chá, pertencente á CMVMC de Carreiras, Ermille, Chaos e Fradalvite, no concello de Lobeira.

Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 16 de xaneiro de 2024

Luis Jorge Álvarez Ferro
Presidente do Xurado Provincial de Clasificación de Montes Veciñais
en Man Común de Ourense