O Pleno da corporación, en sesión do 28 de decembro de 2023, aprobou inicialmente a proposta de modificación do escudo heráldico do Concello de Cortegada e a proposta da futura bandeira, segundo se describe:
ESCUDO:
De gules (vermello) e sobre ondas de prata (branco), unha copa de ouro (amarelo), flanqueada de senllas serpes de sinople (verde), enriba dunha venera de prata e todo enriba, á súa vez, de sete cruces treboladas de ouro, ben ordenadas no xefe. Ao timbre, a coroa real pechada.
BANDEIRA:
O pano vermello coa copa de amarelo e venera branca flanqueadas das dúas serpes verdes. Ao hasta, as sete cruces treboladas de amarelo, ben ordenadas, e as dúas ondas brancas, ao batente.
Dando cumprimento ao establecido no Decreto 19/2010, do 11 de febreiro, polo que se aproba o Regulamento de símbolos das entidades locais de Galicia, sométese a información pública, mediante anuncios publicados no Diario Oficial de Galicia e no taboleiro de edictos, durante o prazo dun mes desde o día seguinte ao da publicación no DOG, para que os interesados poidan efectuar as alegacións que consideren oportunas.
Cortegada, 10 de xaneiro de 2024
Avelino Luis de Francisco Martínez
Alcalde