Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 2 de outubro de 2023, en relación co deslindamento parcial entre as comunidades de montes veciñais en man común de Couso (concello de Ponteareas) e Cans (concello do Porriño), ao respecto da estrema común dos seus montes (expediente DC22016).

Feitos:

Primeiro. O 20.9.22022, Carmen Boente Cima, en representación da comunidade de montes veciñais en man común (en diante CMVMC) de Couso, presentou no rexistro electrónico da Xunta de Galicia, co núm. de entrada 2022/2312531, solicitude de deslindamento entre a CMVMC de Couso (Ponteareas) e a CMVMC de Cans (O Porriño).

Os montes veciñais en man común (en diante MVMC) afectados por este deslindamento son:

– MVMC de Couso (ID monte: 3029) da CMVMC de Couso

– MVMC de Carrascal e Seixo e Pedra que fala (ID monte: 2980) da CMVMC de Cans

Segundo. Consta no expediente a seguinte documentación do deslindamento consonte o artigo 53 da Lei 7/2012:

• Acta de apeo do deslindamento o 3.3.2022. Acta de apeo complementaria que modifica a coordenada dun punto o 8.7.2022

• Acta de conciliación (X53 conciliación 0000337/2022) entre as comunidades no Xulgado de Primeira Instancia e Instrución nº 3 do Porriño o 26.7.2022.

• Certificados da aprobación do deslindamento nas asembleas xerais de ambas as CMVMC: CMVMC de Couso o 24.04.2022 e a CMVMC de Cans o 30.4.2022.

• Memoria descritiva co plano de deslindamento e cartografía en formato dixital no Datum ETRS89/UTM zona 29N EPSG: 25829. Asinado en xullo de 2022 polo técnico colexiado núm.1277 do COETF de Galicia

• Informes de validación gráfica catastral cos CSV: DF1GKCPEKW7BPW47 e 0TG289VPS61FWYP3 (para a comunicación da alteración catastral consonte o artigo 55.3 da Lei 7/2012), que polo principio de colaboración entre administracións deberá verificar a Xerencia Territorial do Catastro.

Terceiro. A liña de deslindamento proposta ten unha lonxitude de 1.105 metros e está composta polos seguintes puntos:

Punto 0: x: 534.535,7295; y: 4.667.240,7680

Punto 1: x: 534.487,1286; y: 4.667.468,9776

Punto 2: x: 534.431,0325; y: 4.667.673,7899

Punto 3: x: 534.542,5695; y: 4.668.067,8909

Punto 4: x: 534.584,2002; y: 4.668.169,3546

Punto 5: x: 534.625,8941; y: 4.668.303,1961

Revisada a cartografía das resolucións de clasificación de ambos os MVMC, detéctase que existe estrema entre ambos e non afecta terceiros propietarios.

O punto 0 é o punto coincidente co deslindamento aprobado no ano 2016 entre Atios e Cans.

O punto 5 é o punto coincidente entre o Aciordo 2/2012 (expediente actual DC23004) Couso-Xinzo e o Acordo 3/2012 (expediente actual DC23005) Xinzo-Cans.

A liña do deslindamento non respecta a liña do Instituto Xeográfico Nacional entre os concellos de Ponteareas e O Porriño. O deslindamento establécese mediante acordo das comunidades implicadas nel.

A liña de deslindamento produce modificacións na cartografía dos esbozos de clasificación das seguintes comunidades:

– CMVMC de Couso: o expediente de revisión de esbozo RE22035 xa recolle o actual deslindamento.

– CMVMC de Cans: achega un pequeno axuste para pechar o punto 5 do deslindamento co resto do esbozo do seu MVMC. O Servizo de Montes executa un axuste do esbozo da CMVMC de Cans, segundo o deslindamento aprobado en 2016 entre a CMVMC de Atios e CMVMC de Cans.

O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.

Consideracións legais e técnicas:

Primeira. A presente resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e consideracións legais e técnicas expostos, o Xurado, por unanimidade dos seus membros,

ACORDA:

Aprobar o deslindamento parcial realizado entre a CMVMC de Couso (Ponteareas) e a CMVMC de Cans (O Porriño), respecto da súa estrema común, nos termos indicados no feito terceiro.

Contra a presente resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e cos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 22 de decembro de 2023

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra