Examinada a solicitude de deslindamento formulada polos representantes do monte veciñal en man común (MVMC) Aceveda ou Coto de Castiñeira, pertencente á Comunidade de Montes Veciñais en Man Común (CMVMC) de Castiñeira, e máis o MVMC de Vilariño, pertencente á CMVMC de Vilariño, no concello de Vilariño de Conso, resultan os seguintes
Feitos:
Primeiro. O 8 de xullo de 2022 a CMVMC de Castiñeira presentou un escrito (Rexel 2022/1794982) no cal solicitan a aprobación do deslindamento entre o MVMC Aceveda ou Coto de Castiñeira (CMVMC de Castiñeira) co MVMC de Vilariño.
Coa solicitude achegou a seguinte documentación:
– Acta de deslindamento.
– Certificacións de aprobación das respectivas asembleas xerais.
– Memoria e planos.
– Acta de conciliación levantada no Xulgado de Paz de Vilariño de Conso.
Segundo. O informe do Servizo de Montes da Xefatura Territorial de Ourense do 9 de marzo de 2023 fai constar que a documentación achegada corresponde ao deslindamento parcial do perímetro estremeiro entre o MVMC Aceveda ou Coto Castiñeira, pertencente á CMVMC de Castiñeira, e o MVMC de Vilariño, pertencente á CMVMC de Vilariño, desde o vértice 1 (o situado máis ao S) ata o vértice (auxiliar) 4 (o situado máis ao N).
Logo de analizar os vértices e a súa localización, conclúese que os puntos que se van aprobar son os comprendidos entre o 1 e o 3, xa que o 4 se corresponde, pola súa vez, co punto 2 do deslindamento entre a CMVMC de Castiñeira e mais a de Vilariño, tendo (o punto 4) simplemente a condición de punto auxiliar que permite definir a dirección da liña de deslindamento a partir do vértice 3.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación dos puntos 1 e 3 avinzados, tendo o vértice 4 a consideración de punto auxiliar.
Consideracións legais e técnicas:
Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 9 de marzo de 2023, o Xurado Provincial de Montes Veciñais en Man Común acordou por unanimidade o día 23 de outubro de 2023:
Aprobar o acto de conciliación acadado polas xuntas reitoras dos MVMC Aceveda ou Coto de Castiñeira, pertencente á CMVMC de Castiñeira, e mais o MVMC de Vilariño, pertencente á CMVMC de Vilariño, no concello de Vilariño de Conso.
Contra esta resolución, que pon fin á vía administrativa, poderase interpor recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo ante o Xulgado do ContenciosoAdministrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 16 de novembro de 2023
Luis Jorge Álvarez Ferro
Presidente do Xurado Provincial de Clasificación de
Montes Veciñais en Man Común de Ourense