Expediente: IN407A 2023/178-1.

Promotora: UFD Distribución Electricidad, S.A.

Denominación do proxecto: adecuación CT Magán (15CD77).

Concello: Santiago de Compostela.

Feitos:

1. O día 28 de marzo de 2023, a empresa promotora solicitou a autorización administrativa previa e a autorización administrativa de construción do proxecto de execución da dita instalación de distribución eléctrica. Co obxecto de adecuar o centro de transformación CT Magán (15CD77) existente na avenida do Cruceiro, concello de Santiago de Compostela, proxéctase reformar ese centro de transformación de 250 kVA e repotencialo mediante a instalación dunha máquina de 630 kVA e de dous novos tramos soterrados de liñas en media tensión para conectalo coa liña de distribución de media tensión LMT SCY821 (IN407A 2016/2375-1), procedente da subestación San Caetano.

Ao abeiro do artigo 123 do Real decreto 1955/2000, achegan memoria, planos e orzamento co proxecto de execución denominado adecuación CT Magán (15CD77), asinado o 20.1.2023 por Victoriano González Lemos, enxeñeiro técnico industrial eléctrico con número de colexiado 2.980 de Vigo.

2. O proxecto non se someteu ao trámite de información pública, segundo o artigo 50 da Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Consonte o artigo 127 do Real decreto 1955/2000, do 1 de decembro, trasladóuselle unha separata do proxecto ao Concello de Santiago de Compostela como entidade afectada, na parte en que a instalación puider afectar bens e dereitos ao seu cargo. A separata contén as características da instalación e a documentación cartográfica correspondente. No día desta resolución, non consta no expediente resposta á solicitude de informe.

4. O día 1 de setembro de 2023 emitiuse o informe técnico.

Consideracións legais e técnicas:

Primeira. O xefe territorial é competente para resolver este expediente segundo o Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia; o artigo 41 do Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo), modificado polo Decreto 49/2023, do 19 de maio (DOG núm. 98, do 25 de maio), consonte a disposición transitoria primeira do Decreto 79/2023, do 22 de xuño, polo que se fixa a estrutura orgánica das vicepresidencias e das consellerías da Xunta de Galicia (DOG núm. 119, do 23 de xuño).

Segunda. Lexislación de aplicación:

– Lei 24/2013, do 26 de decembro, do sector eléctrico.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Real decreto 842/2002, do 2 de agosto, polo que se aproba o Regulamento electrotécnico para baixa tensión.

– Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

Terceira. Características técnicas:

As instalacións de alta tensión obxecto deste expediente están situadas na avenida do Cruceiro, no concello de Santiago de Compostela, e as súas características técnicas son as seguintes:

– 2 × LMTS (actuacións 1 e 2) a 20 kV, de 6 m, condutor tipo RHZ1-2OL 12/20 kV 1×240 mm2 Al, con orixe no CT Magán (15CD77) existente obxecto da reforma e remate en PAR existente da LMT SCY821 (IN407A 2016/2375-1), procedente da subestación San Caetano, situado en fronte do CT.

– Reforma e repotenciación do CT Magán (15CD77) existente en envolvente de obra civil, consistente en:

• Instalación dun centro de transformación compacto manobra exterior 2L+1P telecontrolado de 630 kVA/20 kV no interior do edificio actual.

• Desmontarase a máquina actual de 250 kVA, o cadro de baixa tensión, o xestor do CT, ferraxes e os elementos da aparellaxe convencional ao aire: interruptores, seccionadores e fusibles.

• Construción de bancada de obra civil para acometida de cables, elaboración de foxo para o total de volume do líquido dieléctrico, con reixa, croios apagalumes e soporte completo para o novo trafo.

• Reforma das liñas de entrada e saída do CT.

• Saneamento, recebo e pintado interior de paredes e teitos, así como o pintado do exterior da edificación.

• Substitución da porta por unha normalizada de persoal e maquinaria para este tipo de centros.

• Interconexión do novo cadro de baixa tensión cos cables das saídas da baixa tensión subterránea actual.

• Instalación de placa deflectora para favorecer a condución de aire para ventilación interior do centro.

• Redución da altura do CT actual.

Cuarta. No expediente consta un informe favorable dos servizos técnicos desta xefatura territorial.

De acordo con todo o exposto,

RESOLVO:

1. Conceder a autorización administrativa previa e a autorización administrativa de construción para a dita instalación de distribución eléctrica.

2. A instalación executarase no prazo dun ano, contado a partir do día seguinte ao da publicación desta resolución no Diario Oficial de Galicia.

3. Para a posta en funcionamento da instalación autorizada, deberá achegar ante esta xefatura territorial unha solicitude coa cal xuntará a seguinte documentación:

• As declaracións de conformidade relativas ao material ou equipamento, e as certificacións ou homologacións, se procede.

• Un certificado do/da director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas oportunas na montaxe da instalación e posta a punto.

• Planimetría as built da instalación eléctrica en formato shape.

4. Esta aprobación outórgase sen prexuízo doutras que sexan de aplicación segundo a lexislación vixente, en especial no relativo á ordenación do territorio e ao ambiente.

Contra esta resolución, que non é definitiva en vía administrativa, poderase interpor recurso de alzada perante a conselleira de Economía, Industria e Innovación no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren pertinente.

Mediante este documento notifícaselles aos interesados esta resolución, segundo o exixido no artigo 40.1 da dita Lei 39/2015.

A Coruña, 25 de outubro de 2023

Isidoro Martínez Arca
Xefe territorial da Coruña