Examinada a solicitude de revisión de esbozo formulada polos representantes do monte veciñal en man común (MVMC) Serra de Vales, pertencente á Comunidade de Montes Veciñais en Man Común (CMVMC) de Bouza, no concello de Viana do Bolo, resultan os seguintes

Feitos:

Primeiro. O 21.9.2022 a CMVMC de Bouza presentou unha solicitude (Rexel número 2022/2318595) de revisión de esbozo do MVMC Serra de Vales, no concello de Viana do Bolo.

Coa solicitude achegaron a seguinte documentación:

– Certificación do acordo da Asemblea Xeral do 28.8.2022.

– Memoria e planos.

– Arquivos xeográficos en formato vectorial.

Segundo. O Servizo de Montes da Xefatura Territorial de Ourense emitiu un informe favorable o día 2 de febreiro de 2023 en relación coa citada solicitude. Nel indícase que o perímetro obxecto de revisión inclúe unicamente as partes do perímetro lindeiras con particulares. Non se modifican os límites cos montes veciñais estremeiros.

A superficie do MVMC Serra de Vales, unha vez revisado o esbozo, resulta de 256,536 ha fronte ás 247 ha do acordo de clasificación inicial. Polo tanto, prodúcese un aumento de superficie de case un 4 %.

Tendo en conta o anterior, emítese informe favorable de revisión do esbozo do MVMC Serra de Vales.

Consideración legal y técnica:

Única. A Lei 7/2012, do 28 de xuño, de montes de Galicia, na súa disposición transitoria décimo terceira, establece o procedemento de revisión de esbozos de montes veciñais en man común.

De acordo con ela, os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión, e axustaranse e completaranse con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 2 de febreiro de 2023, o Xurado Provincial de Clasificación de Montes Veciñais en Man Común acordou por unanimidade, o día 23 de outubro de 2023, aprobar a proposta de revisión de esbozo do MVMC Serra de Vales, pertencente á CMVMC de Bouza, no concello de Viana do Bolo.

Ourense, 6 de novembro de 2023

O presidente do Xurado Provincial de Clasificación de Montes
Veciñais en Man Común de Ourense
P.S. (Resolución do 12.7.2022)
José Antonio García Rodríguez
Xefe do Servizo Xurídico-Administrativo