Desguaces 24 Horas, S.L., de conformidade co artigo 245 do Regulamento do dominio público hidráulico, solicita a autorización para a vertedura por infiltración no terreo (bacía do río Anllóns) dun caudal máximo de 4.465,88 m3/ano de augas residuais industriais e de escoamento depuradas procedentes das instalacións dun taller e centro de despezamento de vehículos fóra de uso localizado no lugar da Braña Grande 25, Cabovilaño (t.m. A Laracha).

As augas residuais industriais e de escoamento xeradas nas instalacións son tratadas nun separador de hidrocarburos de clase I con desareador e célula coalescente. As instalacións contan tamén cun separador de hidrocarburos de clase II e unha cámara de graxas para o tratamento previo de parte das augas residuais industriais e de escoamento, antes do separador de hidrocarburos de clase I.

As augas residuais industriais e de escoamento depuradas vértense por infiltración no terreo (bacía do río Anllóns) mediante unha gabia filtrante, no punto das coordenadas UTM (ETRS89): X=530.208; Y=4.787.831.

As augas residuais domésticas procedentes das instalacións están canalizadas á rede de saneamento municipal.

O que se fai público para xeral coñecemento por un prazo de trinta (30) días, contados a partir do seguinte día á data da publicación no Diario Oficial de Galicia do presente anuncio, co fin de que os interesados poidan presentar as súas reclamacións, durante o prazo sinalado, ante Augas de Galicia, en cuxo portal da internet (https://augasdegalicia.xunta.gal/) se atopa exposto o proxecto para que poida ser examinado por quen desexe.

Santiago de Compostela, 30 de outubro de 2023

Leticia Valladares López
Xefa da Área de Verteduras