Para os efectos previstos na Lei 24/2013, do 26 de decembro, do sector eléctrico (BOE núm. 310, do 27 de decembro), e no título VII do Real decreto 1955/2000, do 1 de decembro (BOE núm. 310, do 27 de decembro), polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, sométese a información pública a petición de autorización administrativa previa e de construción e a declaración de utilidade pública, en concreto, da seguinte instalación eléctrica.
Denominación: peche de anel LAT 20 kV entre LAT Fonsagrada 1 e LAT Pontenova (CT Galegos-CT Lourido) (Riotorto).
Solicitante: Barras Eléctricas Galaico-Asturianas, S.A.
Domicilio social: rúa Aller Ulloa, 9. 27003 Lugo.
Características técnicas principais:
– Liña eléctrica de alta tensión aérea, a 20 kV, de 1.448 metros de lonxitude en condutor tipo 94-AL1/22-ST1A (LA 110), con orixe no apoio proxectado núm. 1 e final no apoio núm. 10 proxectado na LAT Pontenova.
– Liña eléctrica de alta tensión aérea, a 20 kV, de 13 metros de lonxitude en condutor tipo 47-AL1/8-ST1A (LA 56), con orixe no apoio núm. 10 proxectado na LAT Pontenova e final no CT intemperie existente 11342 Lourido.
– Liña eléctrica de alta tensión soterrada, a 20 kV, de 180 metros de lonxitude en condutor tipo HEPRZ1- 12/20 kV 1X240 K Al + H16, con orixe no apoio A25670 da LAT Fonsagrada 1 e final no apoio núm. 1 proxectado, con entrada e saída no CT Galegos proxectado..
– Substitución do centro de transformación intemperie (CTI) Galegos existente por un novo CT prefabricado de 50 kVA de potencia instalada, 630 kVA de potencia máxima admisible e relación de transformación 20.000/400-230 V.
A declaración de utilidade pública, segundo o sinalado no artigo 56 da citada Lei 24/2013, levará implícita, en todo caso, a necesidade de ocupación dos bens ou de adquisición dos dereitos afectados e implicará a urxente ocupación, para os efectos do artigo 52 da Lei do 16 de decembro de 1954, de expropiación forzosa (BOE núm. 351, do 17 de decembro).
A relación concreta e individualizada de bens e dereitos afectados que se consideran de necesaria ocupación figura no anexo que se insire xunto con esta resolución.
Aquelas persoas ou entidades que se consideren afectadas poderán presentar as súas alegacións nesta xefatura territorial (edificio administrativo da Xunta de Galicia en Lugo, rolda da Muralla 70) referidas ás posibles limitacións á constitución da servidume de paso de liñas eléctricas (artigo 161 do Real decreto 1955/2000) e aqueloutras que consideren oportunas, no prazo de trinta días hábiles contado desde o día seguinte ao da última publicación ou ao da notificación individual.
Durante este prazo poderase examinar o proxecto das instalacións nesta xefatura territorial, de luns a venres, entre as nove da mañá e as dúas da tarde, e na seguinte ligazón web da Consellería: https://economia.xunta.gal/transparencia/instalacions-electricas/riotorto
Ata o mesmo momento do levantamento das actas previas, os interesados poderán facer alegacións por escrito para os únicos efectos de corrixir posibles erros que se atopen ao relacionar os bens e dereitos afectados, segundo dispón o artigo 56.2 do Regulamento da Lei de expropiación forzosa (BOE núm. 160, do 27 de xuño).
Esta publicación realízase igualmente para os efectos do artigo 44 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), cando os titulares dos predios propostos sexan descoñecidos, non se saiba o lugar de notificación, ou ben, tentada a notificación, non se puidese realizar e así dirixirlle ao Ministerio Fiscal as dilixencias que se produzan, de conformidade co artigo 5 da Lei de expropiación forzosa, do 16 de decembro de 1954.
Lugo, 16 de outubro de 2023
Gustavo José Casasola de Cabo
Xefe territorial de Lugo