O 17 de xullo de 2023 publicouse no Diario Oficial de Galicia núm. 135 a Orde do 13 de xullo pola que se establecen as bases reguladoras das subvencións Emprendemento Plus para apoiar o investimento e a creación de emprego co obxectivo de fortalecer e consolidar iniciativas de emprendemento de persoas autónomas e pemes, susceptibles de seren cofinanciadas no marco do programa Galicia Feder 2021-2027 (apoio ao investimento) e se procede á súa convocatoria en réxime de concorrencia competitiva para as anualidades 2023-2024 (código de procedemento TR880B).
No artigo 20.7.a) da mencionada Orde do 13 de xullo de 2023 denominado Xustificación e forma de pagamento, establecíanse os prazos de xustificación desta convocatoria para cada un dos programas obxecto da axuda, así como os períodos de emisión de facturas e de realización de pagamentos dos gastos executados. Concretamente para o Programa I. Emprendemento Plus Investimento sinalábanse os seguintes prazos:
Primeira anualidade 2023:
• Desde o 1 de xaneiro de 2023 ata o 31 de outubro de 2023.
• Presentación da documentación xustificativa, ata o 31 de outubro de 2023.
Tendo en conta a demora na resolución destas axudas, motivada pola complexidade do proceso de avaliación, e dado que se non causa prexuízo a terceiros, considérase necesario ampliar o prazo de xustificación para a anualidade 2023 establecido no artigo 20.7.a) da devandita Orde do 13 de xullo de 2023 co fin de que as empresas beneficiarias teñan un período de marxe para a execución e xustificación dos gastos elixibles e en consecuencia procede modificar tamén o prazo de emisión e pagamento de facturas.
Ademais, atendendo ao prazo máximo de presentación de solicitudes, que foi o 17 de agosto de 2023, segundo o descrito no artigo 30 da convocatoria, e que a modificación de ampliación de prazo para a presentación da xustificación de gastos da anualidade 2023 vai desde o 31 de outubro ata o 17 de novembro de 2023, conclúese que a dita modificación non excede a metade do prazo orixinal, de conformidade co disposto no artigo 32 da Lei 39/2015, do 1 de outubro, do procedemento administrativo común das administracións públicas.
En consecuencia, logo dos informes favorables da Asesoría Xurídica e da Intervención Delegada da Consellería de Promoción do Emprego e Igualdade, e no exercicio das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,
RESOLVO:
Artigo único. Modificación do artigo 20.7.a) da Orde do 13 de xullo de 2023 pola que se establecen as bases reguladoras das subvencións Emprendemento Plus
O punto 7.a) do artigo 20 queda redactado da seguinte maneira:
a) Programa I. Emprendemento Plus Investimento.
Períodos de emisión das facturas (realización de gastos) e realización de pagamentos dos gastos executados:
Primeira anualidade 2023:
• Desde o 1 de xaneiro de 2023 ata o 17 de novembro de 2023.
• Presentación da documentación xustificativa, ata o 17 de novembro de 2023.
Segunda anualidade 2024:
• Desde o 18 de novembro de 2023 ata o 31 de outubro de 2024.
• Presentación da documentación xustificativa, ata o 31 de outubro de 2024.
Disposición adicional única. Prazo de presentación de solicitudes
A publicación desta orde non supón a apertura dun novo prazo de presentación de solicitudes.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de outubro de 2023
Elena Rivo López
Conselleira de Promoción de Emprego e Igualdade