O Pleno da Corporación municipal, en sesión ordinaria realizada o 31 de xullo de 2023, adoptou os acordos que de seguir se transcriben:

«Primeiro. Aprobar inicialmente a modificación puntual nº 12 do Plan xeral de ordenación municipal de Sanxenxo.

Segundo. Someter o documento aprobado inicialmente a información pública durante o prazo de dous meses, mediante anuncio que se publicará no Diario Oficial de Galicia e nun dos xornais de maior difusión na provincia.

Terceiro. Suspender o outorgamento de licenzas naqueles ámbitos do territorio obxecto do planeamento cuxas novas determinacións supoñan a modificación da ordenación urbanística vixente, identificados no plano de ordenación nº 2 do documento aprobado inicialmente.

A duración máxima da suspensión será de dous anos contados desde a aprobación inicial e, en todo caso, extinguirase coa aprobación definitiva do novo plan.

Cuarto. Solicitar ás administracións públicas competentes os informes sectoriais preceptivos».

De conformidade co establecido no artigo 60 da Lei 2/2016, do 10 de febreiro, do solo de Galicia, exponse o expediente a información pública polo prazo de dous meses, contado a partir do día seguinte ao da publicación do anuncio no Diario Oficial de Galicia e nun dos xornais de máis ampla difusión da provincia, co obxecto de que se poidan formular as alegacións que se consideren procedentes.

O documento inicialmente aprobado pode consultarse no taboleiro de anuncios da sede electrónica do Concello de Sanxenxo (https://concellodesanxenxo.sedelectronica.gal) e nas dependencias municipais do Servizo de Urbanismo do Concello de Sanxenxo, cita previa no teléfono 986 72 00 75.

Sanxenxo, 30 de agosto de 2023

Telmo Martín González
Alcalde presidente