Examinado o expediente instruído a instancia da empresa Barras Eléctricas Galaico Asturianas, S.A., con enderezo para os efectos de notificación na rúa Aller Ulloa, 9, 27003 Lugo, aprécianse os seguintes
Antecedentes de feito.
Primeiro. O 30 de agosto de 2022, a citada empresa solicita a autorización administrativa previa e de construción e a declaración de utilidade pública, en concreto, para a instalación eléctrica denominada proxecto para peche de anel 20 kV LMT Fonsagra_1 (SE_Meira) con LMT Meira_2 (SE_Fonsagrada) CT Outariz (CD_260)-CT Vilares (CD_1035), no concello de Ribeira de Piquín, presentando o preceptivo proxecto das instalacións a que fai referencia o Real decreto 1955/2000, do 1 de decembro (BOE núm. 310, do 27 de decembro de 2000), que regula as actividades de transporte, distribución, comercialización, subministración e procedementos de autorización de instalacións de enerxía eléctrica, e xuntando a relación concreta e individualizada de bens e dereitos afectados pola instalación, que determina a Lei 24/2013, do 26 de decembro, do sector eléctrico (BOE núm. 310, do 27 de decembro de 2013) e o artigo 143 do Real decreto 1955/2000, antes citado.
Segundo. O proxecto someteuse a información pública para os efectos previstos na Lei 24/2013, do 26 de decembro, do sector eléctrico, e no Real decreto 1955/2000, do 1 de decembro, mediante o Acordo desta xefatura territorial do 4 de outubro de 2022. Este acordo foi publicada no diario El Progreso do 14 de outubro de 2022 e no Diario Oficial de Galicia do 14 de outubro de 2022, no taboleiro de anuncios da citada xefatura territorial e no taboleiro de anuncios do Concello de Ribeira de Piquín. Con este acordo inseríase a relación de bens e dereitos afectados.
Así mesmo, practicouse notificación individual aos interesados incluídos na relación de bens e dereitos afectados.
Terceiro. Enviáronselles separatas relativas ao proxecto aos diferentes organismos afectados e cumpríronse os trámites establecidos no artigo 127 do Real decreto 1955/2000, do 1 de decembro.
Cuarto. Durante o trámite de información pública presentaron alegacións os seguintes interesados:
– Amable García Cancio: o cultivo real das parcelas é o de plantación forestal e non o de monte baixo.
– José María García López: o cultivo real das parcelas é o de plantación forestal e non o de monte baixo.
En ambos os dous casos a empresa corrixiu o cultivo das parcelas no sentido dos alegantes, quedando supeditada a comprobación e valoración real das afeccións ao acto de levantamento de actas previas.
– Carlos Gómez Fernández: acredita ser titular lexítimo das parcelas núm. 14, 17 e 29, que figuran na RBDA como titularidade de María Pura Concepción Fernández.
Quinto. Persoal dos servizos técnicos desta xefatura territorial emitiu informe favorable sobre a solicitude obxecto deste expediente, de acordo co disposto na Lei 24/2013, do 26 de decembro, do sector eléctrico, e no Real decreto 1955/2000, do 1 de decembro. Igualmente, unha vez revisado sobre o terreo o trazado da liña eléctrica proxectada, os referidos servizos técnicos informan que non se dá ningunha das limitacións para a imposición da servidume de paso de enerxía eléctrica a que se refire o artigo 161 do Real decreto 1955/2000, en relación co artigo 58 da Lei 24/2013, sobre os predios incluídos na relación de bens e dereitos que foi obxecto de información pública e sobre os que a empresa beneficiaria non chegou a un acordo amigable cos seus propietarios.
A estes feitos son de aplicación os seguintes
Fundamentos de dereito.
Primeiro. A esta xefatura territorial correspóndelle resolver sobre a presente solicitude de acordo coas competencias que resultan do Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (modificado polo Decreto 49/2023, do 19 de maio), e tendo en conta o Decreto 9/2017, do 12 de xaneiro (DOG núm. 22, do 1 de febreiro), sobre órganos competentes para autorización de instalacións eléctricas na Comunidade Autónoma de Galicia, en relación co Real decreto 1955/2000, do 1 de decembro, e a Lei 24/2013, do 26 de decembro, do sector eléctrico.
Segundo. No expediente cumpríronse os trámites sinalados no artigo 53 da Lei 24/2013, e os regulamentarios previstos nos capítulos II e V do título VII do Real decreto 1955/2000, do 1 de decembro, que regula o procedemento de autorización de instalacións de enerxía eléctrica.
Terceiro. Á vista do informe técnico e do resto da documentación que figura no expediente, considérase que procede a autorización da instalación eléctrica.
Cuarto. Sen prexuízo do anterior, cómpre ter en conta que, consonte o artigo 151 do citado Real decreto 1955/2000, do 1 de decembro, en calquera momento a empresa beneficiaria e os titulares dos necesarios bens e dereitos poden convir un mutuo acordo, causando a correspondente conclusión do expediente expropiatorio.
De acordo co exposto e en virtude das competencias que ten atribuídas, esta xefatura territorial
RESOLVE:
Primeiro. Conceder a autorización administrativa á empresa Barras Eléctricas Galaico Asturianas, S.A., para o establecemento da instalación eléctrica denominada proxecto para peche de anel 20 kV LMT Fonsagra_1 (SE_Meira) con LMT Meira_2 (SE_Fonsagrada) CT Outariz (CD_260)-CT Vilares (CD_1035), no concello de Ribeira de Piquín, coas seguintes características técnicas principais:
• Liña de media tensión aérea a 20 kV, cunha lonxitude de 2.213 m en condutor 94-AL1/22-ST1A (LA 110), con orixe no apoio núm. 0 proxectado en substitución do apoio BMT200000368-4BM02228-9 existente da LMT Fonsagra_1 e final na conversión aero-soterrada do apoio núm. 14 proxectado.
• Liña de media tensión soterrada a 20 kV, cunha lonxitude de 45 m en condutor RHZ1-OL 12/20 kV 1x240 K Al + H16, con orixe na conversión aero-soterrada do apoio existente (código 1035) da LAT Meira_2, en que está instalado o centro de transformación intemperie Vilares que se vai desmontar, e final no centro de transformación (CT) proxectado de Vilares.
• Liña de media tensión soterrada a 20 kV, cunha lonxitude de 85 m en condutor RHZ1-OL 12/20 kV 1x240 K Al + H16, con orixe no CT proxectado de Vilares e final na conversión aero-soterrada do apoio núm. 14 da LMT Fonsagra_1 con Meira_2 proxectada.
• Centro de transformación prefabricado, cunha potencia de 50 kV, relación de transformación 20.000/400-230 V e configuración 2L+1P.
Segundo. Conceder a autorización administrativa de construción para a execución do proxecto da instalación eléctrica denominada proxecto para peche de anel 20 kV LMT Fonsagra_1 (SE_Meira) con LMT Meira_2 (SE_Fonsagrada) CT Outariz (CD_260)-CT Vilares (CD_1035).
Terceiro. Declarar a utilidade pública, en concreto, da instalación eléctrica obxecto do presente expediente, o que implica a necesidade de ocupación dos bens ou da adquisición dos dereitos afectados e a urxente ocupación para os efectos do artigo 52 da Lei de expropiación forzosa. Por isto, en cumprimento do disposto neste artigo, acórdase que o representante da Administración dea comezo, na data e hora que a cada interesado se lle notificará individualmente, ao levantamento das actas previas á ocupación dos predios contidos na relación de bens e dereitos publicada no diario El Progreso do 14 de outubro de 2022 e no Diario Oficial de Galicia do 14 de outubro de 2022, expostas no taboleiro de anuncios desta xefatura territorial e no taboleiro de anuncios do Concello de Ribeira de Piquín. Así mesmo, faise constar que ata o momento do levantamento das actas previas, poderán formularse as alegacións que se consideren oportunas, para os efectos de rectificar posibles erros na relación de bens afectados que foi obxecto de publicación nos medios e nas datas anteriormente referidos. Estas alegacións deberanse presentar por escrito perante esta Xefatura Territorial de Economía, Industria e Innovación (Edificio Administrativo da Xunta de Galicia en Lugo, rolda da Muralla, 70, 27071 Lugo).
Todo isto de acordo coas condicións seguintes:
Primeira. As instalacións que se autorizan terán que realizarse de acordo coas especificacións e cos planos que figuran no proxecto para peche de anel 20 kV LMT Fonsagra_1 (SE_Meira) con LMT Meira_2 (SE_Fonsagrada) CT Outariz (CD_260)-CT Vilares (CD_1035), presentado pola empresa Barras Eléctricas Galaico Asturianas, S.A.
Segunda. O peticionario asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que se manterán as condicións regulamentarias de seguridade con carácter permanente.
Terceira. Deberase cumprir canto establece a lexislación técnica de liñas eléctricas de alta tensión e as súas instrucións técnicas complementarias, de acordo co Real decreto 223/2008, do 15 de febreiro, así como, de ser o caso, a lexislación aplicable ás instalacións de baixa tensión e as súas instrucións técnicas complementarias, de acordo co Real decreto 842/2002, do 2 de agosto, ademais do resto de normativa e directrices vixentes que sexan de aplicación.
Cuarta. Para introducir modificacións nas instalacións que afecten datos básicos do proxecto será necesaria a autorización previa desta xefatura territorial.
Quinta. O prazo de posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.
Sexta. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.
Esta publicación realízase igualmente para os efectos do artigo 44 da Lei 39/2015, do 1 de outubro, do procedemento administrativo común das administracións públicas, (BOE núm. 236, do 2 de outubro) cando os titulares dos predios propostos sexan descoñecidos, non se saiba o lugar de notificación, ou ben, tentada a notificación, non se puidese realizar, e así dirixirlle ao Ministerio Fiscal as dilixencias que se produzan, de conformidade co artigo 5 da Lei de expropiación forzosa, do 16 de decembro de 1954.
Contra esta resolución, que non é definitiva en vía administrativa, cabe interpor recurso de alzada ante conselleiro de Economía, Industria e Innovación no prazo dun mes, a partir do día seguinte ao da súa notificación/publicación, de conformidade cos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpor calquera outro recurso que consideren pertinente.
Lugo, 23 de agosto de 2023
O xefe territorial de Lugo
P.A. (Artigo 41.3 do Decreto 116/2022, do 23 de xuño)
Juan Carlos Morán del Pozo
Xefe do Servizo de Industria