No Xulgado do Contencioso-Administrativo número 2 de Santiago de Compostela tramítase o recurso 82/2023 (procedemento abreviado), interposto por Daniel Fernández Loureiro contra a Resolución do 26 de decembro de 2022, da Dirección Xeral de Recursos Humanos, pola que se realiza a convocatoria excepcional no proceso selectivo de estabilización, polo sistema de concurso de méritos, para o ingreso nas categorías de técnico/a especialista de sistemas e tecnoloxías da información, técnico/a de xestión de sistemas e tecnoloxías da información e técnico/a superior de sistemas e tecnoloxías da información (DOG núm. 4, do 5 de xaneiro).

O recorrente pretende que se condene a Administración demandada a:

– Incluír como valorables os servizos prestados como indefinido non fixo, tanto neste proceso selectivo como para os seguintes procesos, así como para efectos de carreira profesional, concursos, etc.

– Incluír todas as prazas vacantes, tanto do Servicio Galego de Saude como dos organismos dependentes deste, que cumpren os requisitos da Lei 20/2021 na convocatoria do proceso impugnado.

O que se notifica para xeral coñecemento de todas as persoas interesadas no procedemento, que son emprazadas para que poidan comparecer no xulgado como demandadas no prazo de nove días, de conformidade co previsto no artigo 49 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 10 de agosto de 2023

Ana Mª Comesaña Álvarez
Directora xeral de Recursos Humanos