Mediante a Resolución da Alcaldía, do 9 de maio de 2023, aprobouse inicialmente a modificación do estudo de detalle da rúa Otero Pedraio, concello de Nigrán, nos termos propostos no documento asinado polo técnico redactor o 27 de febreiro de 2023 (CSV C1QK5YCG4YWQOE8J).

En cumprimento do artigo 80 da Lei 2/2016, do 10 de febreiro, do solo de Galicia, e do artigo 194 do seu regulamento (Decreto 143/2016), o expediente sométese a información pública polo prazo dun mes, contado desde o día seguinte ao da última publicación deste anuncio no Diario Oficial de Galicia e nun dos xornais de maior difusión na provincia, para que as persoas interesadas poidan consultalo e formular, de ser o caso, as alegacións que consideren oportunas.

O citado proxecto pódese consultar presencialmente nas dependencias municipais, en horario laborable, de luns a venres, ou de xeito telemático a través da sede electrónica do Concello de Nigrán (sede.nigran.org, sección Normativa municipal, subsección Normas en tramitación).

Igualmente, para os efectos do establecido no artigo 47.1 da Lei 2/2016, do 10 de febreiro, do solo de Galicia, faise público que na referida Resolución da Alcaldía do 9 de maio de 2023 se acorda a suspensión do procedemento de outorgamento de licenzas no citado ámbito.

Nigrán, 10 de maio de 2023

Juan Antonio González Pérez
Alcalde