Segundo o artigo 9.4 da Lei 8/2013, do 28 de xuño, de estradas de Galicia, os cambios de titularidade das estradas ou treitos delas, cando non se trate de travesías urbanas ou treitos delas que estean incluídos no inventario de travesías da súa Administración titular, deberán ser aprobados por decreto da Xunta de Galicia, por proposta da consellería competente en materia de estradas e logo do acordo entre as administracións afectadas.
Por outra parte, a citada Lei de estradas dispón no artigo 9.7 que os cambios de titularidade poderán abranguer estradas, treitos delas, elementos funcionais e/ou espazos da zona de dominio público adxacente.
O Concello de Moaña e a Deputación Provincial de Pontevedra asinaron o día 23 de xuño de 2020 un convenio de colaboración para a execución do proxecto de recuperación do espazo público e de mellora da mobilidade peonil entre os p.q. 1+200 e 1+780 da EP-1104 Moaña-Coiro. A cláusula quinta do dito convenio recollía a obriga do Concello de solicitar a transferencia de titularidade do treito inicial da estrada EP-1101-Moaña-Verducedo.
O Pleno da Deputación Provincial de Pontevedra na sesión ordinaria do día 28 de outubro de 2022 aceptou o cambio de titularidade proposto no convenio.
A Axencia Galega de Infraestruturas, de acordo co informe emitido polo servizo competente, indica que a estrada EP-1101 cumpre co estipulado no punto 11 do artigo 18 do Regulamento xeral de estradas de Galicia, relativo aos cambios de titularidade de treitos de estradas a favor de administracións de menor ámbito territorial, segundo o cal estes só se levarán a cabo cando se trate de treitos terminais ou cando non impliquen a interrupción de ningún dos itinerarios dos que forme parte sen que exista unha alternativa viaria, existente ou planificada, para todos eles que proporcione un nivel de servizo cando menos equivalente, a través da rede de estradas da administración cedente ou das redes de estradas de titularidade de administracións de maior ámbito territorial, polo que se formula a proposta favorable á transferencia de titularidade que se define no artigo 1.
De conformidade co anteriormente exposto, por proposta da conselleira de Infraestruturas e Mobilidade e logo de deliberación do Consello da Xunta de Galicia na súa reunión do día quince de xuño de dous mil vinte e tres,
DISPOÑO:
Artigo 1
Aprobar o cambio de titularidade do treito inicial da estrada a prol do Concello de Moaña:
|
Estrada |
Denominación |
p.q.i |
p.q.f |
Lonx. (km) |
|
EP-1101 |
Moaña-Verducedo |
0+000 |
0+260 |
0,260 |
Artigo 2
De acordo co establecido no artigo 9.6 da Lei 8/2013, do 28 de xuño, de estradas de Galicia, o cambio de titularidade será efectivo ao día seguinte da publicación deste decreto no Diario Oficial de Galicia. A entrega dos bens formalizarase no prazo dos dous meses seguintes a esta publicación mediante a sinatura da correspondente acta de entrega entre o Concello e a Deputación.
Artigo 3
Correspóndenlle ao Concello de Moaña, a partir da formalización da entrega, todas as actividades de xestión, mantemento, conservación e explotación da vía, así como o exercicio das funcións de disciplina viaria e calquera outra que puidese corresponderlle como nova Administración titular.
Disposición derradeira
O presente decreto producirá efectos desde o día seguinte ao da súa publicación no Diario Oficial de Galicia.
Santiago de Compostela, quince de xuño de dous mil vinte e tres
Alfonso Rueda Valenzuela
Presidente
Ethel María Vázquez Mourelle
Conselleira de Infraestruturas e Mobilidade
