En cumprimento do disposto na Lei 24/2013, do 26 de decembro, do sector eléctrico; na Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental, modificada pola Lei 5/2017, do 19 de outubro, de fomento da implantación de iniciativas empresariais en Galicia, e pola Lei 9/2021, do 25 de febreiro, de simplificación administrativa e de apoio á reactivación económica de Galicia; no Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica; na Lei 21/2013, do 9 de decembro, de avaliación ambiental; na Lei 1/2021, do 8 de xaneiro, de ordenación do territorio de Galicia, e demais normas vixentes de aplicación, sométese a información pública a solicitude relacionada coa instalación que se describe a seguir:

Solicitante: Enel Green Power España, S.L.

Denominación do proxecto: liña AT 132 kV sub. P.E. Pico Touriñán-sub. P.E. Monte Festeiros.

Concellos afectados: Cerdedo-Cotobade, A Estrada, Forcarei e Silleda (Pontevedra).

Orzamento total (execución material): 2.395.724,23 €.

Obxecto: evacuación da enerxía xerada polo parque eólico Pico Touriñán.

Características técnicas recollidas no proxecto:

Liña aéreo-subterránea, con orixe no apoio nº 1 de entroncamento na subestación do parque eólico Pico Touriñán e final no apoio nº 68 de entroncamento na subestación do parque eólico Monte Festeiros.

Potencia que se transportará: 24,8 MW.

A liña ten una lonxitude total de 22.393,70 m, repartida en tres tramos:

• Primeiro tramo: liña aérea entre os apoios 1 (inicio de liña) e 57 (paso aéreo-subterráneo), de 19.528,80 m de lonxitude total e cotas entre 420 e 831 m, con 3 condutores nus de aluminio con alma de aceiro tipo LA-180 147-AL1/34-ST1A (181,6 mm2 de sección por condutor) e cable de garda tipo OPGW (cable combinado de protección e comunicacións) de 180 mm2 de sección. Tendidos sobre apoios metálicos de celosía de diferentes tipos con cimentacións de formigón, compostos por perfís de aceiro galvanizado, fuste formado por tramos troncopiramidais de sección cadrada e cabezas de tramos prismáticos de sección tamén cadrada, cos seus correspondentes illadores, ferraxes e sistemas de posta a terra. Discorre polos concellos de Cerdedo-Cotobade, A Estrada, Forcarei e Silleda.

• Segundo tramo: liña subterránea entre os apoios 57 e 58 (pasos aéreo-subterráneos) de 139,56 m de lonxitude, con cotas de arredor de 830 m, con 3 condutores RHZ1-OL 76/132 kV 1×630 Al baixo tubo (630 mm2 de sección por condutor), e 1 cable de fibra óptica tipo monomodo de 48 fibras (baixo tubo). Discorre polo concello de Silleda.

• Terceiro tramo: liña aérea entre os apoios 58 (paso aéreo-subterráneo) e 68 (fin de liña) de 2.725,34 m de lonxitude total e cotas entre 741 e 792 m, de características técnicas idénticas ás do primeiro tramo. Discorre polo concello de Silleda.

Órgano competente: o órgano competente para autorizar o proxecto da referida instalación eléctrica é a Dirección Xeral de Planificación Enerxética e Recursos Naturais.

Procedemento de avaliación ambiental: o proxecto da referida instalación eléctrica está suxeito a avaliación de impacto ambiental ordinaria, segundo o establecido no artigo 7.1 da Lei 21/2013, do 9 de decembro, de avaliación ambiental.

De acordo co disposto no artigo 33 da Lei 8/2009, do 22 de decembro, e polas demais normas de aplicación relacionadas ao inicio desta resolución, constitúen o obxecto da información pública os seguintes documentos: proxecto técnico, estudo de impacto ambiental e proxecto de interese autonómico.

O que se fai público de conformidade co artigo 33.10 da Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental, modificada pola Lei 5/2017, do 19 de outubro, de fomento da implantación de iniciativas empresariais en Galicia, e pola Lei 9/2021, do 25 de febreiro, de simplificación administrativa e de apoio á reactivación económica de Galicia, para coñecemento xeral, e para que todas aquelas persoas, naturais ou xurídicas, que se consideren prexudicadas nos seus dereitos, poidan presentar as súas alegacións no prazo de trinta (30) días, contados a partir do día seguinte ao da última publicación desta resolución.

A consulta da documentación realizarase preferentemente a través da seguinte ligazón da web da Vicepresidencia Primeira e Consellería de Economía, Industria e Innovación: https://economia.xunta.gal/transparencia/documentos-sometidos-a-informacion-publica, na epígrafe Instalacións de xeración. A atención será telefónica no número 986 80 52 11.

Cando sexa indispensable a atención presencial, poderase acudir á Xefatura Territorial da Vicepresidencia Primeira e Consellería de Economía, Industria e Innovación de Pontevedra (avenida Mª Victoria Moreno, 43, 5º, 36071 Pontevedra), mediante cita previa no número de teléfono indicado, así como ás dependencias do Concello de Cerdedo-Cotobade (Chan, 11, 36856 Carballedo, Pontevedra, ou praza do Concello, 1, 36130 Cerdedo, Pontevedra), do Concello da Estrada (praza do Concello, s/n, 36680 A Estrada, Pontevedra), do Concello de Forcarei (praza da Igrexa, 1, 36650 Forcarei, Pontevedra) e do Concello de Silleda (rúa Trasdeza, 55, 36540 Silleda, Pontevedra).

Pontevedra, 12 de xuño de 2023

Beatriz López del Olmo
Xefa territorial de Pontevedra