Visto o expediente para outorgamento da autorización administrativa previa e de construción para a instalación eléctrica que a continuación se describe:

Peticionario: Begasa.

Domicilio social: rúa Ramón María Aller Ulloa, 9, 27003 Lugo.

Denominación: novo CS As Abidueiras e LSAT 20 kV Riotorto de interconexión.

Situación: concello de Mondoñedo.

Características técnicas principais:

• Liña subterránea de alta tensión a 20 kV Riotorto, entrada desde SE Mondoñedo, con orixe nun paso aéreo a subterráneo proxectado no apoio existente A98425 e final no novo CS As Abidueiras, cunha lonxitude de 149 metros en condutor HEPRZ1-240 mm.

• Liña subterránea de alta tensión a 20 kV Riotorto, saída cara ao CT 1947 Valiñadares, con orixe no CS As Abidueiras e final nun paso aéreo a subterráneo proxectado no apoio existente A98425, cunha lonxitude de 149 metros en condutor HEPRZ1-240 mm.

• Liña subterránea de alta tensión a 20 kV Riotorto, saída cara ao CT 1620 Santalla, con orixe no CS As Abidueiras e final nun paso aéreo a subterráneo proxectado no apoio existente A98425, cunha lonxitude de 149 metros en condutor HEPRZ1-240 mm.

• Centro de seccionamento prefabricado As Abidueiras, no cal se instalan tres celas de liña telemandadas e unha cela de protección con transformador para servizos auxiliares.

Finalidade da instalación: mellora de instalacións.

Orzamento: 83.188,23 euros.

Documentación que se xunta:

• Separata para o Concello de Mondoñedo.

• Separata para Augas de Galicia.

• Separata para a Consellería de Cultura, Educación, Formación Profesional e Universidades.

Esta xefatura territorial, de acordo coas competencias que resultan do Decreto 116/2022, do 23 de xuño, polo que se establece a estrutura orgánica da Consellería, e tendo en conta o Decreto 9/2017, do 12 de xaneiro, sobre órganos competentes para autorización de instalacións eléctricas na Comunidade Autónoma de Galicia,

RESOLVE:

En relación coa instalación de alta tensión, conceder a autorización administrativa previa e de construción ás ditas instalacións sen prexuízo de terceiros e con independencia das autorizacións que sexan necesarias para a execución da obra por parte doutros órganos da Administración, condicionada ao cumprimento das seguintes condicións:

Primeira. As instalacións deberán axustarse na súa execución ao disposto no citado proxecto de execución, e a dirección de obra deberá levala a cabo un técnico competente.

Segunda. O peticionario asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade.

Terceira. En todo momento deberán cumprirse as normativas e directrices vixentes que sexan de aplicación, en particular canto establecen a Lei 24/2013, do 26 de decembro, do sector eléctrico, o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias, e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias.

O prazo de posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.

Contra esta resolución poderase interpor recurso de alzada, ante o vicepresidente primeiro e conselleiro de Economía, Industria e Innovación, no prazo dun mes a partir do día seguinte ao da notificación ou publicación desta resolución; tamén se poderá interpor calquera outro recurso que se considere pertinente en dereito.

Lugo, 30 de maio de 2023

Gustavo José Casasola de Cabo
Xefe territorial de Lugo