O Pleno do Concello de Pontevedra, na sesión ordinaria que tivo lugar o 2 de maio de 2023, adoptou, entre outros, e por maioría absoluta, o seguinte acordo:
«(...) Primeiro. Acordar, por solicitude da Dirección Xeral de Defensa do Monte da Consellería do Medio Rural e segundo o proxecto para o cambio de uso da parcela da base helitransportada do Campiño, datado en marzo de 2023, subscrito polo arquitecto Ángel Jaime Santorio Cuartero e conformado pola arquitecta municipal, o cambio de uso da parcela con referencia catastral 4054012NG3945S0001UY, que conta cunha superficie real, segundo recente medición, de 20.526,45 m2 (informe e plano elaborado pola OTAP o 18.5.2022), descrita no expositivo do presente acordo, situada na rúa Chan da Parafita núm. 10 (Marcón) e incluída no eido do Programa de actuación urbanística e Plan parcial do polígono industrial e comercial O Campiño-Solo urbanizable A-3, como dotación urbanística pública de carácter local encadrada dentro do sistema de espazos libres públicos e cualificada como espazo libre de uso e dominio público pola modificación puntual do PP do polígono aprobada definitivamente o 28.9.1995, con destino a outro uso dotacional público, en concreto a equipamento social, regulado no artigo 66 da normativa do PP, dentro do sistema de equipamentos, coa obriga de que manteña a titularidade pública da parcela que, logo da preceptiva tramitación, será obxecto de cesión á Xunta de Galicia coa finalidade de regularizar a situación urbanística e de autorizacións sectoriais preceptivas en que se atopa a base de helicópteros do Campiño, que xestiona o Servizo de Prevención e Defensa contra Incendios Forestais dependente da Dirección Xeral de Defensa do Monte, de estratéxica importancia territorial para a loita contra os incendios e que se considera un servizo imprescindible para garantir a seguranza da poboación no eido xeográfico e territorial da súa competencia.
Segundo. Dispor a publicación do anuncio deste acordo no Diario Oficial de Galicia por conta da solicitante, con indicación expresa de que o contido íntegro do proxecto estará á disposición do público na sede electrónica do Concello de Pontevedra, www.sede.pontevedra.gal, ao abeiro do disposto na Lei 19/2013, de transparencia, acceso á información pública e bo goberno.
Unha vez publicado o anuncio no DOG, o instrumento de planeamento que serve de base a este acordo será inscrito, se procede, no Rexistro de Ordenación do Territorio e Planeamento Urbanístico de Galicia, por petición deste Concello, para o que se remitirá un exemplar en soporte dixital, debidamente dilixenciado pola Secretaría do Pleno.
O documento do proxecto que contén a normativa e as ordenanzas aplicables á parcela por mor do cambio de uso, ao que se lle incorporará a referencia aos informes sectoriais emitidos, ademais de na sede electrónica, será publicado no Boletín Oficial da provincia de Pontevedra, unha vez recibido, de ser procedente, o certificado de inscrición no Rexistro do instrumento de planeamento, para lograr a eficacia e executividade do acordo, consonte o establecido na lexislación de réxime local, concretamente nos artigos 70.2, 70.ter e 65 da Lei reguladora das bases do réxime local. (...)».
O que se fai público para a súa executividade, comunicando que contra o citado acordo, que pon fin á vía administrativa, quen se considere lexitimado poderá interpoñer directamente recurso contencioso-administrativo, perante a Sala do Contencioso-Administrativo do Tribunal Superior de Xustiza de Galicia, no prazo de dous meses contados a partir do día seguinte ao da publicación deste anuncio no DOG, consonte o establecido nos artigos 10.1 e 46.1 da Lei 29/1998, do 13 de xullo, reguladora da xurisdición contencioso-administrativa. Todo isto sen prexuízo de que se poida interpoñer calquera outro recurso que se entenda máis procedente e sexa conforme dereito.
Así mesmo, infórmase que nestas datas xa se atopa publicado na sede electrónica do Concello de Pontevedra (ligazón exacta no día de hoxe (http://www.pontevedra.gal/areas/urbanismo-e-territorio/planeamentourbanistico/planeamento-de-desenvolvemento/) o contido íntegro do documento aprobado polo Pleno do Concello de Pontevedra, en cumprimento do disposto na Lei 19/2013, de transparencia, acceso á información pública e bo goberno.
Pontevedra, 16 de maio de 2023
Miguel Anxo Fernández Lores
Alcalde
