O Pleno da Corporación do Concello de Santiago de Compostela, na sesión ordinaria que tivo lugar o 4 de xullo de 2022, aprobou definitivamente o Plan parcial de ordenación do SUND-8 (Monte Vidán), formulado por iniciativa particular de Santiago Sur Galicia, S.L. (SSG) e asinado polo arquitecto Manuel Gallego Jorreto.

O 9 de agosto de 2022, a promotora presentou un documento refundido que integra as reformas sinaladas no acordo plenario de aprobación definitiva.

O acordo de aprobación definitiva publicarase no Diario Oficial de Galicia, e a normativa e as ordenanzas publicaranse no Boletín Oficial da provincia.

Así mesmo, remitirase á Consellería de Medio Ambiente, Territorio e Vivenda a documentación exixida polo artigo 88.3 da LSG, para os efectos de inscribir o plan parcial no Rexistro de Ordenación de Territorio e Planeamento Urbanístico de Galicia.

En todo caso, e de conformidade co exixido polo artigo 199.4 do RLSG, a eficacia do acto de aprobación definitiva e a entrada en vigor do Plan quedan condicionadas ao cumprimento dos anteriores trámites e ao sinalado no artigo 70.2 da Lei 7/1985, do 2 de abril, de bases do réxime local, en relación co artigo 65.4 da mesma lei.

De conformidade co disposto polo artigo 267.2 do Regulamento de desenvolvemento da Lei do solo de Galicia, o acordo de aprobación definitiva do plan parcial determina o inicio do procedemento de equidistribución do polígono, que deberá publicarse no BOP e notificarse persoalmente aos titulares afectados.

Contra o acordo de aprobación definitiva do citado plan parcial poderase interpoñer directamente recurso contencioso-administrativo ante o Tribunal Superior de Xustiza de Galicia, no prazo de dous meses contado a partir do día seguinte ao da publicación deste anuncio.

Santiago de Compostela, 2 de maio de 2023

O alcalde
P.D. (DEC/4742/2019, do 17 de xuño de 2019)
Mercedes Rosón Ferreiro
Concelleira delegada de Urbanismo, Vivenda e Cidade Histórica