O Pleno da Corporación do Concello de Santiago de Compostela, na sesión ordinaria que tivo lugar o 30 de marzo de 2023, adoptou o seguinte acordo:
Aprobar definitivamente o estudo de detalle para a definición urbanística da dotación de accesibilidade aos inmobles de vivenda colectiva situados na rúa do Penedo 56 a 68 (Corredoira da Campsa), segundo o documento reformado elaborado pola Sección de Planeamento en marzo de 2023.
Aprobar definitivamente a delimitación do ámbito da actuación sobre o medio urbano, para os efectos do disposto nos artigos 24 do texto refundido da Lei do solo (Real decreto lexislativo 7/2015) e 13 da Lei 1/2019, de rehabilitación, rexeneración e renovación urbanas de Galicia.
Ao abeiro do que dispón o artigo 13.5 da citada Lei 1/2019, acórdase que as instalacións de mellora da accesibilidade e de eficiencia enerxética previstas no estudo de detalle non computarán para os efectos de edificabilidade, volume máximo edificable e ocupación de parcela, nin de distancias mínimas a lindeiros, outras edificacións, espazos públicos e vías públicas, ou cumprimento de aliñacións.
A aprobación definitiva do estudo de detalle habilita a ocupación do espazo público afectado a favor da comunidade de propietarios dos edificios existentes, e poderá acordarse a cesión de uso do voo do espazo público durante o tempo en que se manteña a edificación ou, de se considerar procedente, o seu alleamento.
O acordo de aprobación definitiva publicarase no Diario Oficial de Galicia, e a normativa urbanística publicarase no Boletín Oficial da provincia. Así mesmo, remitirase á Consellería de Medio Ambiente, Territorio e Vivenda a documentación exixida polo artigo 88.3 da LSG, para os efectos de inscribir o estudo de detalle no Rexistro de Ordenación do Territorio e Planeamento Urbanístico de Galicia.
En todo caso, e de conformidade co exixido polo artigo 199.4 do RLSG, a eficacia do acto de aprobación definitiva e a entrada en vigor do Plan quedan condicionadas ao cumprimento dos anteriores trámites e ao sinalado no artigo 70.2 da Lei 7/1985, do 2 de abril, de bases do réxime local, en relación co 65.4 da mesma lei.
Contra o acordo de aprobación definitiva do citado estudo de detalle poderase interpor directamente recurso contencioso-administrativo ante o Tribunal Superior de Xustiza de Galicia, no prazo de dous meses contado a partir do día seguinte ao da publicación deste anuncio.
Santiago de Compostela, 10 de abril de 2023
O alcalde
P.D. (DEC/4742/2019, do 17 de xuño de 2019)
Mercedes Rosón Ferreiro
Concelleira delegada de Urbanismo, Vivenda e Cidade Histórica