De conformidade co artigo 9.b) da Lei 5/1992, do 10 de xuño, de creación do Instituto Galego de Promoción Económica, e co artigo 6 do Decreto 133/2002, do 11 de abril, polo que se regula a concesión de préstamos polo Igape, modificado polo Decreto 155/2019, do 28 de novembro, o Consello de Dirección é o órgano competente para resolver favorable ou desfavorablemente as solicitudes de préstamos xestionados polo Igape.
En caso de incumprimento das condicións de concesións de préstamos, o órgano competente para resolver os procedementos de reintegro do compoñente de axuda que poida existir, regulados no artigo 37 da Lei 9/2007, do 13 de xuño, de subvencións de Galicia, é o órgano concedente.
Por isto, os procedementos de incumprimento de condicións de concesión de préstamos do Igape e reintegro da cantidade correspondente son iniciados e resoltos polo Consello de Dirección do Igape, coa excepción dos préstamos IFI extraordinarios COVID-19, de importe igual ou inferior a 50.000 €, nos cales xa se atopa delegada a competencia na persoa titular da Dirección Xeral, tanto da resolución das solicitudes de préstamo como dos procedementos de incumprimento e reintegro.
Tendo en consideración que a resolución destes procedementos supón a aplicación da normativa aplicable en materia de execución de gastos, pagamentos e o resto de compromisos normativamente establecidos, sen compoñente de avaliación cualitativa de riscos inherentes aos proxectos, e co obxectivo de mellorar a celeridade e eficacia na tramitación, así como a simplificación administrativa, o Consello de Dirección do Igape, na súa xuntanza do 28 de marzo de 2023, acordou delegar na persoa titular da Dirección Xeral do Igape a competencia para a súa resolución.
Na súa virtude, de conformidade coas facultades que teño conferidas,
RESOLVO:
Primeiro. Publicar a seguinte delegación de facultades acordada polo Consello de Dirección do Igape na súa xuntanza do 28 de marzo de 2023:
Delégase na persoa titular da Dirección Xeral do Igape a competencia para iniciar e resolver os procedementos de incumprimento e reintegro de cantidades que se incoen con respecto aos préstamos concedidos polo Igape.
Segundo. Esta delegación aplicarase aos procedementos de incumprimento e reintegro de cantidades que se inicien con posterioridade á data da súa publicación no Diario Oficial de Galicia.
Santiago de Compostela, 10 de abril de 2023
Fernando Guldrís Iglesias
Director xeral do Instituto Galego de Promoción Económica