O Consello Europeo aprobou, o pasado 21 de xullo de 2020, o instrumento financeiro NextGenerationEU, que inclúe como elemento central un mecanismo para a recuperación e a resiliencia; e, o 27 de abril de 2021, por acordo do Consello de Ministros aprobouse o proxecto de Plan de recuperación, transformación e resiliencia para España.
O Plan de recuperación, transformación e resiliencia inclúe como compoñente 20 o Plan estratéxico de impulso á formación profesional, que supón a continuidade do Plan de modernización da formación profesional. Entre os investimentos dese compoñente 20 está o investimento 1, denominado Reskilling e upskilling da poboación activa ligado a cualificacións profesionais, entre cuxas liñas de actuación figura a número 4, que atende á formación en competencias emerxentes, de rápida evolución e con prospectiva na xeración de emprego. Así mesmo, atende tamén á formación naqueles sectores que, como consecuencia da previsible evolución das condicións económicas e sociais, xerarán no futuro postos de traballo.
No marco do devandito Plan de recuperación, transformación e resiliencia, a Consellería de Promoción do Emprego e Igualdade articulou, entre outros instrumentos xurídicos, programas mediante convenios de colaboración con financiamento da Unión Europea-NextGenerationEU, o que determina a necesidade da súa publicación no Diario Oficial de Galicia.
Estes convenios de colaboración están asinados entre a Consellería de Promoción do Emprego e Igualdade e os clústeres e asociacións de empresas mencionados a seguir:
– Asociación Clúster TIC Galicia.
– Fundación Laboral de la Construcción.
– Clúster de Empresas de Automoción de Galicia (Ceaga).
– Clúster das Enerxías Renovables de Galicia (Cluergal).
– Asociación de Industrias do Metal e Tecnoloxías Asociadas de Galicia (Asime).
– Federación Galega de Comercio.
– Clúster do Naval Galego (Aclunaga).
– Cámara Oficial Mineira de Galicia.
– Asociación Gallega de Hidrógeno.
En consecuencia, a través desta resolución dáse publicidade ao devandito convenio de colaboración para a realización de accións formativas de cualificación e recualificación da poboación activa en sectores estratéxicos e mellora das capacidades para a transición ecolóxica, no marco do Plan de recuperación, transformación e resiliencia, coas seguintes características:
– Obxecto do convenio: establecer as condicións polas que se rexerá a colaboración entre os clústeres e asociacións de empresas e a Consellería de Promoción do Emprego e Igualdade para a realización de accións formativas, de carácter non formal, vinculadas co Catálogo nacional de cualificacións profesionais, de cualificación e recualificación da poboación activa dos respectivos sectores que se axusten ás necesidades máis inmediatas de formación do capital humano das empresas que o integran e que permita a actualización das competencias profesionais ou a adquisición doutras novas no marco sectorial e empresarial correspondente.
– Data de sinatura dos convenios: 10 de xaneiro de 2023.
– Prazo de vixencia: desde o 2 de xaneiro ata o 31 de decembro de 2023.
– A Consellería de Promoción do Emprego e Igualdade achega ás ditas entidades as cantidades establecidas na seguinte táboa, con cargo á aplicación orzamentaria 11.50.323B.481.1 dos orzamentos xerais da Comunidade Autónoma de Galicia para o financiamento do obxecto do convenio e no marco do Plan de recuperación, transformación e resiliencia financiado pola Unión Europea-NextGenerationEU:
Código proxecto 2022 00172 |
Código proxecto 2023 00122 |
Total |
||
Asociación Clúster TIC Galicia |
G70157581 |
668.846,00 € |
668.846,00 € |
|
Fundación Laboral de la Construcción |
G80468416 |
523.603,00 € |
69.840,00 € |
593.443,00 € |
Clúster de Empresas de Automoción de Galicia (Ceaga) |
G36983575 |
315.214,00 € |
315.214,00 € |
|
Clúster das Enerxías Renovables de Galicia (Cluergal) |
G70284120 |
351.360,00 € |
351.360,00 € |
|
Asociación de Industrias do Metal e Tecnoloxías Asociadas de Galicia (Asime) |
G36614774 |
334.262,00 € |
121.536,00 € |
455.798,00 € |
Federación Galega de Comercio |
G27170158 |
561.700,00 € |
561.700,00 € |
|
Clúster do Naval Galego (Aclunaga) |
G15710338 |
118.485,00 € |
118.485,00 € |
|
Cámara Oficial Mineira de Galicia |
Q1570001F |
192.150,00 € |
192.150,00 € |
|
Asociación Gallega de Hidrógeno |
G16854234 |
75.270,00 € |
75.270,00 € |
|
3.332.266,00 € |
Santiago de Compostela, 27 de marzo de 2023
José Ramón Pardo Cabarcos
Secretario xeral técnico da Consellería de Promoción
do Emprego e Igualdade