Expediente: IN407A 2022/406-4.

Promotora: UFD Distribución Electricidad, S.A.

Denominación: reforma LMTS CII818 e CS no polígono Castiñeiras.

Concello: Bueu.

Feitos:

Primeiro. O 6 de outubro de 2022, UFD Distribución Electricidad, S.A. solicitou a autorización administrativa previa e a autorización administrativa de construción do proxecto de execución da instalación eléctrica reforma LMTS CII818 e CS no polígono Castiñeiras.

Examinado o proxecto de execución, conclúese que consiste nas seguintes actuacións no polígono Castiñeiras, no concello de Bueu:

Retirada do centro de transformación intemperie Miranda Freire (36AL92) situado no apoio 9SR95OUD//12-6CT, da liña de media tensión aérea desde o apoio 9ST39G7J//12-4 ata o apoio 9SLJC2N2//12-3 e retirada dun total de dez apoios.

Proxéctase un centro de seccionamento compacto de manobra exterior 3L+TT.

Instalación dun total de 83 metros de lonxitude de liña de media tensión subterránea.

Segundo. Esta xefatura territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Bueu, a Deputación Provincial de Pontevedra, Augas de Galicia e o Servizo do Patrimonio Cultural de Pontevedra. A empresa promotora manifestou a súa conformidade co condicionado técnico emitido polo Servizo do Patrimonio Cultural.

Os demais organismos non emitiron os condicionados técnicos, entendéndose en consecuencia a súa conformidade coa autorización de construción da dita infraestrutura eléctrica, conforme o disposto no artigo 131 do Real decreto 1955/2000, do 1 de decembro; sen prexuízo da autorización que lles corresponda outorgar.

Consideracións legais e técnicas:

Primeira. A Xefatura Territorial de Pontevedra é competente para resolver este expediente con fundamento no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo de 2022) e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

Segunda. A lexislación de aplicación ao presente expediente é:

– Lei 24/2013, do 26 de decembro, do sector eléctrico.

– Lei 39/2015, do 1 de outubro, do procedemento administrativo común das administracións públicas.

– Lei 40/2015, do 1 de outubro, de réxime xurídico do sector público.

– Lei 9/2021, do 25 de febreiro, de simplificación administrativa e de apoio á reactivación económica de Galicia.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Lei 5/2017, do 19 de outubro, de fomento da implantación de iniciativas empresariais en Galicia (DOG núm. 203, de 25 de outubro).

Terceira. As características técnicas da instalación son as que a seguir se describen:

– Liña de media tensión subterránea (LMTS) a 20 kV, con condutor RHZ1, en catro actuacións. A primeira é de 19 metros con orixe no paso aéreo subterráneo no apoio proxectado CH-1600/13 e final no empalme en seco coa LMTS CII8181113. A segunda é de 14 metros con orixe no empalme en seco coa LMTS CII8181216 e final na cela de entrada do centro de seccionamento proxectado. A terceira é de 12 metros con orixe na cela de saída do centro de transformación existente Polígono II (36CKV5) e final na cela de entrada do centro de seccionamento proxectado. A cuarta é de 38 metros con orixe na cela de saída do centro de seccionamento proxectado e final no paso aéreo subterráneo no apoio proxectado C-2000/14.

– Centro de seccionamento 3L+TT, con celas compactas con corte en SF6, situado na parcela con referencia catastral 71440H3NG1874S0001HK, en Castiñeiras, Bueu.

– Retirada do centro de transformación intemperie Miranda Freire 36AL92 e de 526 metros da liña de media tensión aérea (LMT CII818 Bueu 18) desde o apoio 9ST39G7J//12-4 ata o apoio 9SLJC2N2//12-3.

A instalación está situada no polígono industrial de Castiñeiras, no concello de Bueu (Pontevedra).

Conforme con todo o indicado,

RESOLVO:

Primeiro. Outorgar a UFD Distribución Electricidad, S.A. as autorizacións administrativas previa e de construción da instalación de distribución de enerxía eléctrica denominada Reforma LMTS CII818 e CS no polígono Castiñeiras (expediente IN407A 2022/406-4), cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.

Segundo. UFD Distribución Electricidad, S.A. asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade. En todo momento deberanse cumprir as normas e directrices vixentes que resulten de aplicación, en particular, canto establece o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09 e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

Terceiro. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

Contra a presente resolución, que non é definitiva en vía administrativa, poderase interpoñer recurso de alzada ante o vicepresidente primeiro e conselleiro de Economía, Industria e Innovación da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Pontevedra, 14 de febreiro de 2023

Beatriz López del Olmo
Xefa territorial de Pontevedra