Con data do 15 de abril de 2019, do 28 de novembro de 2019, do 28 de maio de 2020 e do 21 de outubro de 2020 asináronse, respectivamente, a primeira, a segunda, a terceira e a cuarta addenda ao convenio de colaboración subscrito entre a Xunta de Galicia, a Fegamp e Seaga en materia de prevención e defensa contra incendios forestais para o establecemento dun sistema público de xestión da biomasa nas faixas secundarias.
O devandito convenio asinouse o 9 de agosto de 2018 e publicouse no DOG núm. 156, do 17 de agosto.
De conformidade coa cláusula décimo terceira, as modificacións deste convenio formalizaranse mediante addenda cos mesmos requisitos e coas mesmas condicións que se exixen para a súa aprobación.
Tendo en conta o exposto, e en virtude das competencias conferidas,
RESOLVO:
Publicar a quinta addenda ao convenio de colaboración subscrito entre a Xunta de Galicia, a Fegamp e Seaga en materia de prevención e defensa contra incendios forestais para o establecemento dun sistema público de xestión da biomasa nas faixas secundarias asinada o 19 de decembro de 2022, como anexo a esta resolución.
Santiago de Compostela, 2 de febreiro de 2023
José González Vázquez
Conselleiro do Medio Rural
ANEXO
Quinta addenda ao convenio de colaboración subscrito entre a Xunta de Galicia, a Fegamp e Seaga en materia de prevención e defensa contra incendios forestais, para o establecemento dun sistema público de xestión da biomasa
nas faixas secundarias
Santiago de Compostela, 19 de decembro de 2022
REUNIDOS:
Pola Xunta de Galicia, José González Vázquez, conselleiro do Medio Rural, que actúa por conta e en representación da Xunta de Galicia, nomeado polo Decreto 60/2022, do 15 de maio, polo que se nomean os titulares das vicepresidencias e consellerías da Xunta de Galicia (DOG núm. 94, luns, do 16 de maio) en exercicio das atribucións conferidas no artigo 34 da Lei 1/1983, do 22 de febreiro, reguladora da Xunta e da súa Presidencia.
Pola sociedade mercantil pública autonómica, Empresa Pública de Servizos Agrarios Galegos, S.A. (Seaga), Pablo Arbones Maciñeira, en nome e representación daquela, en virtude das atribucións que lle confiren os seus estatutos.
Pola Federación Galega de Municipios e Provincias, o seu presidente, Alberto Varela Paz, que actúa en nome e representación daquela, en virtude das atribucións que lle confire o artigo 46.1.b) dos seus estatutos.
Todas as persoas intervenientes actúan coa representación que legal e regulamentariamente teñen conferida,
EXPOÑEN:
A Lei 3/2007, do 9 de abril, de prevención e defensa contra os incendios forestais de Galicia, establece no seu artigo 7.d) que corresponde aos concellos a ordenación da execución das obras necesarias para conservar e manter o solo e a biomasa vexetal nas condicións precisas que eviten os incendios, e de xeito máis concreto, a ordenación e execución subsidiaria da xestión da biomasa nos termos dos artigos 22 e 23 da citada lei, contando para iso coa colaboración técnica e/ou económica da Xunta de Galicia nos termos previstos no artigo 59 da Lei 3/2007, do 9 de abril, de conformidade co establecido no artigo 331.1 da Lei 5/1997, do 5 de agosto, de Administración local de Galicia.
O día 9 de agosto de 2018, a Xunta de Galicia, a Fegamp e Seaga asinaron un convenio de colaboración en materia de prevención e defensa contra incendios forestais, para o establecemento dun sistema público de xestión da biomasa nas faixas secundarias, publicado no DOG núm. 156, do 17 de agosto de 2018, co obxecto de instrumentar a cooperación da Administración xeral da Comunidade Autónoma de Galicia, a través da Consellería do Medio Rural, Seaga, e a Fegamp, cos concellos que voluntariamente se adhiran, na xestión da prevención de incendios nas denominadas faixas secundarias de xestión da biomasa, de modo que se acade a diminución do número de incendios forestais nas zonas da interface urbana garantindo así o interese público da seguridade de persoas e de bens.
Como recorda a Lei 3/2007, do 9 de abril, de prevención e defensa contra os incendios forestais de Galicia, unha das áreas máis sensibles para a prevención dos incendios é a interface urbano-forestal, isto é, aquelas áreas que abarcan o perímetro común entre os terreos forestais e os núcleos de poboación habitados. Neste contexto, e a través do citado convenio, canalízase a cooperación entre a Administración local e a Administración autonómica como vía para acometer tarefas de claro interese público como é a de xestionar a biomasa vexetal con alto potencial combustible, especialmente nos terreos forestais que estean cerca dos núcleos de poboación, asegurando a súa retirada con anterioridade á época de perigo de incendios polas persoas titulares das parcelas. Así como, en caso de incumprimento destas obrigas esenciais, asegurar a súa execución subsidiaria, a través de procedementos áxiles, por parte das administracións públicas.
Co obxecto de reforzar o apoio da Administración xeral da Comunidade Autónoma de Galicia na realización das accións que corresponden aos concellos, o convenio modificouse a través dunha primeira addenda asinada o 15 de abril de 2019 e publicada no DOG núm. 90, do 13 de maio.
O 28 de novembro de 2019 asinouse unha segunda addenda (publicada no DOG núm. 6, do 10 de xaneiro de 2020) para facilitar a aplicación de determinadas cláusulas do convenio, que supuxo, entre outras modificacións, o desenvolvemento dunha nova ferramenta en mobilidade, inclusión da posibilidade de que os concellos adheridos poidan realizar execucións subsidiarias ata un máximo de 5 hectáreas con cargo ao convenio, simplificación de trámites administrativos para a aplicación dos ingresos que se perciban da venta das especies arbóreas incluídas nas execucións subsidiarias, e incorporación dunha cláusula en materia de protección de datos.
O 28 de maio de 2020 asinouse unha terceira addenda (publicada no DOG núm. 114, do 12 de xuño) modificando varias cláusulas do convenio coa finalidade de incrementar as actuacións no territorio e de atender ás necesidades derivadas da posta en marcha das iniciativas de mobilización de terras e das iniciativas estratéxicas.
O 21 de outubro de 2020 asinouse a cuarta addenda (publicada no DOG núm. 299, do 12 de novembro) modificándose a cláusula quinta relativa á colaboración financeira para a xestión da biomasa forestal dos montes incluídos nos concellos adheridos ao presente convenio.
A través desta nova addenda articúlanse as modificacións necesarias no convenio para, por unha parte, poder levar a cabo a xestión completa nos sete concellos piloto, seleccionados pola Comisión de Seguimento na reunión do 28 de outubro de 2021 (As Nogais, Monterrei, Cualedro, Lobios, Carnota, Gondomar e A Gudiña), posto que a limitación de 10 hectáreas por concello e ano que fixa o convenio impide poder actuar en cada un destes concellos sobre todas as parcelas revisadas que incumpren os criterios de xestión. Por outra, ampliar a súa vixencia e actualizar o orzamento coas achegas da Consellería do Medio Rural para o exercicio vixente e para o ano 2023.
Segundo o establecido na cláusula décimo terceira, as modificacións deste convenio formalizaranse mediante addenda cos mesmos requisitos e coas mesmas condicións que se exixen para a súa aprobación.
Por todo iso, con base no exposto, as partes acordan asinar a presente addenda de acordo coas seguintes
CLÁUSULAS:
Primeira. Modifícanse os parágrafos segundo e terceiro do número 1 da cláusula quinta, que queda redactada como segue:
Para os efectos do establecido no parágrafo anterior, a Consellería do Medio Rural achegará un importe de 7.750.000 € no exercicio 2020, 7.750.000 € no exercicio 2021, 6.946.000 € no exercicio 2022 e 7.750.000 € no exercicio 2023, con cargo á aplicación orzamentaria 14 02 551B 741.14.
As entidades locais fan achegas, mediante a creación dun subfondo específico dentro do Fondo de Cooperación Local, que incrementarán a dotación económica total do convenio na anualidade correspondente segundo se estableza na correspondente lei anual de orzamentos da Comunidade Autónoma de Galicia. Así, no exercicio 2020 este financiamento é de 2.500.000 €, no ano 2021 é de 1.500.000 €, no exercicio 2022 é de 2.000.000 € e para o exercicio 2023 esta contía ascende a 4.500.000 €.
Segunda. Modifícase a letra c) do número 2 da cláusula sétima, que queda redactada como segue:
c) Realización material das actuacións de xestión de biomasa, derivadas da tramitación de procedementos de execución subsidiaria dos traballos de xestión de biomasa, unha vez notificado polos concellos adheridos o incumprimento nas obrigas de xestión da biomasa segundo o procedemento descrito na Instrución 1/2018, do 26 de abril, relativa ás actuacións administrativas en materia de cumprimento das obrigas de xestión da biomasa vexetal e retirada de especies arbóreas impostas pola Lei 3/2007, do 9 de abril, de prevención e defensa contra os incendios forestais de Galicia, a Lei 11/2021, do 14 de maio, de recuperación da terra agraria de Galicia, e a Lei 7/2012, do 28 de xuño, de montes de Galicia (DOG núm. 87, do 7 de maio de 2018), e se constate a persistencia no incumprimento.
Esta actuación de execución subsidiaria comprenderá a redacción do proxecto para a execución subsidiaria, se for necesario polas características da actuación, ou outro documento técnico que deba servir de base ás actuacións, así como os traballos de xestión da biomasa sobre o terreo e a posterior elaboración do documento/liquidación de custos da execución subsidiaria, que comprenderá todos os gastos ocasionados como consecuencia desta.
As solicitudes destas actuacións poderán dirixirse á Comisión de Seguimento a partir do 1 de xaneiro de cada anualidade. Esta poderá aprobar actuacións subsidiarias ata un máximo de 10 hectáreas por concello e ano, respectando en todo caso a dispoñibilidade orzamentaria.
Esta limitación de 10 hectáreas por concello e ano elimínase no caso daqueles concellos seleccionados pola Comisión de Seguimento como concellos piloto, onde, respectando a dispoñibilidade orzamentaria, poderá actuarse subsidiariamente na totalidade do concello.
Terceira. Modifícase a cláusula undécima, que queda redactada como segue:
Este convenio ten vixencia desde a data da súa sinatura ata o 31 de decembro de 2023, salvo denuncia de calquera das partes antes da súa finalización.
Cuarta. En todo o non modificado expresamente por esta addenda, seguirá sendo de aplicación o disposto no convenio.
Quinta. As partes asinantes outorgan o seu consentimento para que os datos persoais e o resto das especificacións que constan nesta addenda sexan publicados no Portal de Transparencia e Goberno Aberto e no Rexistro de Convenios da Xunta de Galicia, de acordo co establecido no artigo 15 da Lei 1/2016, do 18 de xaneiro, de transparencia e bo goberno, no Decreto 126/2006, do 20 de xullo, polo que se regula o Rexistro de Convenios da Xunta de Galicia, e en concordancia cos artigos 14 e seguintes da Lei 19/2013, do 9 de decembro, de transparencia, acceso á información pública e bo goberno.
En proba de conformidade, as partes asinan a presente addenda.
José González Vázquez, conselleiro do Medio Rural; Alberto Varela Paz, Federación Galega de Municipios e Provincias; Pablo Arbones Maciñeira, Empresa Pública de Servizos Agrarios Galegos, S.A.