A entidade Astilleros Garrido, S.L. solicitou a Portos de Galicia unha concesión administrativa para ocupar 2.710 m2 no dominio público portuario do porto do Grove con destino a varada e reparación de embarcacións.
En cumprimento dos artigos 68 e 70 da Lei 6/2017, do 12 de decembro, de portos de Galicia, faise público para que nun prazo dun (1) mes, contado a partir do día seguinte ao da publicación do presente anuncio no Diario Oficial de Galicia, poidan presentarse outras solicitudes que teñan o mesmo ou distinto obxecto que aquela, e que deberán reunir os requisitos previstos no artigo 70 da citada Lei 6/2017.
A seguir, defínense expresamente os criterios de valoración das propostas, tendo en conta que a valoración máxima de cada proposta serían 100 puntos e que en caso de igualdade de puntuación se terá en conta a orde na presentación:
• Rendibilidade e taxas portuarias: valorarase con 30 puntos sobre 100, outorgando a máxima puntuación á proposta co máximo valor de taxa de ocupación do dominio público portuario (TODP), considerando a superficie e o uso que se vai desenvolver nela. A valoración será de 0 puntos á proposta con menor valor, o máximo número de puntos á proposta con maior valor e interpolando de maneira lineal o resto delas.
• Interese portuario e adecuación á planificación portuaria usos portuarios: segundo o punto 3.3.6 da DEUP do porto do Grove vixente, no que se definen as actividades complementarias compatibles na zona obxecto do trámite de competencia, asignaranse as seguintes puntuacións ás propostas:
– 30 puntos sobre 100 a aquelas propostas que desenvolvan usos complementarios vinculados directamente coa actividade portuaria como: estaleiros, varadoiros e construción/reparación naval.
– 10 puntos sobre 100 a outros usos complementarios vinculados directamente coa actividade portuaria como: loxística, almacéns, manipulación de produtos do mar, avituallamento e venda de efectos navais.
– 5 puntos sobre 100 a outros usos complementarios como: ocio e hostalaría, aparcadoiro...
– 0 puntos sobre 100 a calquera outra actividade.
• Medidas ambientais propostas relativas á actividade que se vai desenvolver: valorarase con 20 puntos sobre 100, outorgando a máxima puntuación á proposta co máximo valor. A valoración será de 0 puntos á proposta con menor valor, o máximo número de puntos á proposta con maior valor e interpolando de maneira lineal o resto delas.
• Investimento: valorarase con 15 puntos sobre 100, outorgando a máxima puntuación á proposta co máximo valor. A valoración será de 0 puntos á proposta con menor valor, o máximo número de puntos á proposta con maior valor e interpolando de maneira lineal o resto delas
• Explotación e coordinación co resto de operacións portuarias: valorarase con 5 puntos sobre 100, outorgando a máxima puntuación a aquelas propostas que xustifiquen adecuadamente que desenvolverán actividades na zona de servizo do porto que presten servizo, supoñan sinerxias ou demanden servizos doutros usuarios ou industrias existentes do porto. A valoración será de con 0 puntos sobre 100 a aquelas propostas que pola súa natureza desempeñen actividades que requiran algún tipo de coordinación co resto de actividades no porto, o máximo número de puntos segundo o criterio anterior e interpolando de maneira lineal o resto delas. Unha vez recibidas todas as propostas, segundo é indicado no artigo 70.8, seleccionarase a proposta mellor valorada mediante resolución da Presidencia de Portos de Galicia.
As solicitudes poderán presentarse mediante o formulario PR004A da sede electrónica da Xunta de Galicia, dirixidas á Área de Explotación e Planificación. O plano de situación da concesión solicitada está á disposición do público para o seu exame na páxina web www.portosdegalicia.es, na epígrafe de«comunicacións e avisos» e dentro de «procesos de información pública».
Santiago de Compostela, 20 de xaneiro de 2023
Susana Lenguas Gil
Presidenta de Portos de Galicia