Visto o expediente para outorgamento das autorizacións administrativas previa e de construción das instalacións eléctricas que a seguir se describen, tal e como se recollen no proxecto asinado en Madrid pola enxeñeira industrial María Isabel López Ferrer, colexiada núm. 17566 do COIIM, en xullo de 2022, con visado colexial núm. 202203377 do 20.7.2022.

Solicitante: UFD Distribución de Electricidad, S.A.; CIF: A63222533.

Enderezo: avenida de América, núm. 38, 28028 Madrid.

Denominación: ampliación da subestación 132/20 kV de Carballeda con nova posición de liña-Encinedo 132 kV.

Situación: A Médua, Carballeda de Valdeorras.

Orzamento: 462.638,80 €.

Características técnicas: ampliación do parque blindado 132 kV da subestación Carballeda, con nova posición de liña (L/Encinedo), tecnoloxía GIS, interior, simple barra. Illante en SF6, con toda a súa aparellaxe asociada. Situación A Médua. Coordenadas UTM fuso 29; X: 675.947,72 e Y: 4.695.131,14.

Cumpridos os trámites ordenados na Lei 24/2013, do 26 de decembro, do sector eléctrico, e no capítulo II, título VII, do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, e na Resolución da Consellería de Economía e Industria, do 19 de febreiro de 2014, pola que se aproba o procedemento de autorización administrativa de construción (DOG núm. 54, do 19 de marzo), así como na Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro), esta xefatura territorial

RESOLVE:

Conceder as autorizacións administrativas previa e de construción das devanditas instalacións, cuxas características se axustarán en todas as súas partes ao proxecto arriba sinalado e ás condicións técnicas e de seguridade establecidas nos regulamentos de aplicación e nos condicionados establecidos polos ministerios, organismos ou corporacións que constan no expediente.

Esta autorización outórgase sen prexuízo das concesións e autorizacións que sexan necesarias, de acordo con outras disposicións que resulten de aplicación e en especial as relativas á ordenación do territorio e ao ambiente.

O prazo de posta en marcha das instalacións que se autorizan será de seis meses, contados a partir da data da última autorización administrativa necesaria para a súa execución.

Contra esta resolución, que non é definitiva na vía administrativa, cabe interpor recurso de alzada ante o vicepresidente primeiro e conselleiro de Economía, Industria e Innovación no prazo dun mes, contado a partir do día seguinte ao da notificación ou publicación desta resolución, conforme o establecido no artigo 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Ourense, 25 de outubro de 2022

Alicia María López Míguez
Xefa territorial de Ourense