O 8 de xullo de 2022 publicouse no Diario Oficial de Galicia número 130 a Resolución do 1 de xullo de 2022 pola que se establecen as bases reguladoras para a concesión, en réxime de concorrencia non competitiva, de subvencións para investimentos en mellora da calidade dos albergues turísticos financiadas ao 100 % no marco do eixe REACT-UE do programa operativo Feder Galicia 2014-2020, como parte da resposta da UE á pandemia da COVID-19, e se anuncia a súa convocatoria para o ano 2022 (código de procedemento TU960B).
A dita resolución ten como obxecto establecer as bases reguladoras para a concesión, en réxime de concorrencia non competitiva, de subvencións á mellora da calidade dos albergues turísticos para potenciar Galicia como destino turístico de peregrinacións. Con estas subvencións prestarase apoio a un colectivo fundamental no conxunto das empresas do sector turístico promovendo o seu desenvolvemento tecnolóxico e o proceso de transformación dixital do sector. O artigo 2.1 sinala que se consideran gastos subvencionables aqueles que se desenvolvan entre o 1 de xaneiro e o 30 de outubro de 2022 e que en ningún caso se admitirán facturas nin xustificantes de pagamento que non estean comprendidos entre esas datas. Por outra banda, o artigo 19 establece que, para cobrar a subvención concedida, o beneficiario terá de prazo ata o 30 de outubro de 2022 para presentar a documentación xustificativa da execución do proxecto.
No presente procedemento de concesión de axudas estanse a rexistrar numerosas solicitudes de prórroga por parte dos beneficiarios, motivadas polas dificultades existentes para executar e xustificar os investimentos subvencionados nas referidas datas límite, debido aos atrasos orixinados nos prazos de entrega dos equipamentos por parte das empresas subministradoras e, ademais, non existe a posibilidade de causar prexuízos a terceiros.
O artigo 45.3 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia (DOG núm. 20, do 29 de xaneiro), establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros.
Por outra banda, remítese ao disposto con carácter xeral no artigo 32 da Lei 39/2015, do 1 de outubro, do procedemento administrativo común das administracións públicas (LPACAP), no cal se indica que a ampliación poderá acordarse de oficio ou por instancia de parte antes do vencemento do prazo de que se trate e se as circunstancias así o aconsellan.
Polo exposto,
RESOLVO:
Primeiro. Modificar a data límite que figura no primeiro parágrafo do artigo 2.1 das bases reguladoras para a concesión, en réxime de concorrencia non competitiva, de subvencións para investimentos en mellora da calidade dos albergues turísticos financiadas ao 100 % no marco do eixe REACT-UE do programa operativo Feder Galicia 2014-2020, como parte da resposta da UE á pandemia da COVID-19, e se anuncia a súa convocatoria para o ano 2022 (código de procedemento TU960B). A redacción do artigo queda da seguinte maneira:
«Considéranse gastos subvencionables aqueles que se desenvolvan entre o 1 de xaneiro e o 30 de novembro de 2022. En ningún caso se admitirán facturas nin xustificantes de pagamento que non estean comprendidos entre esas datas»
Segundo. Modificar a data límite para presentar a documentación xustificativa que figura no artigo 19.1 das bases reguladoras mencionadas no punto anterior. A redacción do artigo queda da seguinte maneira:
«1. A entrega da documentación xustificativa terá de prazo ata o 30 de novembro de 2022».
Terceiro. Modificar a data límite das facturas ou xustificantes de pagamento que figura no artigo 19.2.c) das bases reguladoras mencionadas nos puntos anteriores. A redacción do artigo queda da seguinte maneira:
«Tampouco se admitirán xustificantes ou facturas de pagamento con data anterior á data de inicio das actuacións subvencionables. As facturas ou xustificantes non poderán ser anteriores ao período subvencionable (1 de xaneiro de 2022) nin posteriores á data límite establecida nestas bases (30 de novembro de 2022)».
Cuarto. Publicar esta resolución no Diario Oficial de Galicia, para os efectos previstos nos artigos 44 e 45.3 LPACAP.
Santiago de Compostela, 25 de outubro de 2022
Mª Nava Castro Domínguez
Directora da Axencia Turismo de Galicia
