A Lei orgánica 6/2001, do 21 de decembro, de universidades, establece que a implantación e supresión de ensinanzas conducentes á obtención de títulos universitarios de carácter oficial e validez en todo o territorio nacional serán acordadas pola Comunidade Autónoma, logo de solicitude de implantación polas universidades, segundo o disposto na lexislación vixente.
O Real decreto 822/2021, do 28 de setembro, polo que se establece a organización das ensinanzas universitarias e do procedemento de aseguramento da calidade, regula nos artigos 26 e 27 o procedemento de verificación dos plans de estudos e establecemento do carácter oficial das titulacións. Os plans de estudos serán verificados mediante resolución do Consello de Universidades e autorizados pola Comunidade Autónoma. Mediante acordo do Consello de Ministros establecerase o carácter oficial dos títulos e procederase á publicación no Boletín Oficial del Estado e á súa inscrición no Rexistro de Universidades, Centros e Títulos (RUCT).
No ámbito autonómico esta materia está regulada pola Lei 6/2013, do 13 de xuño, do Sistema universitario de Galicia; pola Orde do 20 de marzo de 2012 que desenvolve o Decreto 222/2011, do 2 de decembro, polo que se regulan as ensinanzas universitarias oficiais no ámbito da Comunidade Autónoma de Galicia, e polo Decreto 161/2015, do 5 de novembro, que modifica o Decreto 222/2011.
No Decreto 222/2011, do 2 de decembro, establécese que o procedemento para obter a autorización de implantación das ensinanzas universitarias oficiais no ámbito territorial propio da Comunidade Autónoma se fará mediante orde da consellería competente en materia de universidades e publicarase no Diario Oficial de Galicia. Previamente terá que recibir o informe do Consello Galego de Universidades, de acordo co previsto no artigo 56 da citada Lei 6/2013, do 13 de xuño.
As universidades, logo de ser autorizadas a implantar os estudos, quedan obrigadas a adoptar as garantías precisas para que non se demore a súa impartición alén dun curso académico. Por razóns excepcionais, debidamente xustificadas, o departamento competente en materia de universidades poderá autorizar a non impartición da titulación outro curso académico.
Unha vez obtido o informe final favorable da ACSUG, o informe do Consello Galego de Universidades do 10 de xuño de 2022 e a resolución de verificación do Consello de Universidades do Ministerio, emitida con data 27 de xullo de 2022, proponse a publicación desta orde pola que se autoriza a implantación do grao en Enxeñaría da Empresa pola Universidad Intercontinental de la Empresa para o curso 2022/23.
Por todo iso,
DISPOÑO:
Artigo único
Autorízase a Universidad Intercontinental de la Empresa para implantar, no curso 2022/23, o grao en Enxeñaría da Empresa.
Disposición derradeira
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 1 de setembro de 2022
Román Rodríguez González
Conselleiro de Cultura, Educación, Formación Profesional
e Universidades