En cumprimento do disposto na Lei 24/2013, do 26 de decembro, do sector eléctrico; no Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, e na Lei 9/2021, do 25 de febreiro, de simplificación administrativa e de apoio á reactivación económica de Galicia, sométese a información pública a solicitude relacionada coas instalacións que se describen a seguir:
Solicitante: UFD Distribución Electricidad, S.A.
Domicilio social: avenida San Luis, 77, 28033 Madrid.
Denominación: regulamentación LAT, 132 kV, San Martín-Carucedo D.A.R. AP.100.
Situación: concello de Rubiá.
Características principais recollidas no proxecto:
– Substitución na LAT, 132 kV, San Martín-Carucedo do apoio núm. 100, por distancias antirregulamentarias, por un novo apoio (100N), tipo en triángulo AG-AC, que se situará baixo a traza a 8 m do existente, cara o apoio 99. Outras actuacións: instalación de contrapesos de 30 kg nas cadeas de illadores do apoio 99, do mesmo tipo que as existentes na liña eléctrica, e tendido de novo condutor LA-280 e AC-50 no van apoio 100N/apoio 101.
O obxecto da información pública será a autorización administrativa previa, a autorización administrativa de construción e a declaración de utilidade pública, en concreto, da citada instalación eléctrica. A declaración de utilidade pública levará implícita, de acordo co artigo 56 da Lei 24/2013, do 26 de decembro, do sector eléctrico, a necesidade da urxente ocupación para os efectos da expropiación forzosa dos bens e dereitos afectados necesarios para o establecemento destas instalacións.
Documentación que se expón:
1. O proxecto de execución, asinado pola enxeñeira industrial María Isabel López Ferrer, colexiada nº 17566 do COIIM, o 24.5.2022.
2. A relación concreta e individualizada dos propietarios de bens e de dereitos afectados, que figura no anexo a este acordo.
3. Planos parcelarios do proxecto.
O que se fai público, para o coñecemento xeral, así como, en particular, dos propietarios dos predios que figuran na relación anexa a este acordo, e das persoas que, sendo titulares de dereitos reais ou intereses económicos sobre os bens afectados, fosen omitidas, para que poidan examinar a documentación técnica anteriormente relacionada e, se for o caso, presentar as alegacións ou observacións que coiden oportunas dentro do prazo de trinta (30) días, que se contará a partir do día seguinte ao da publicación deste acordo no Diario Oficial de Galicia.
Toda a documentación poderase examinar nesta Xefatura Territorial da Vicepresidencia Primeira e Consellería de Economía, Industria e Innovación en Ourense, rúa Curros Enríquez, núm. 1, 32003 Ourense, e na seguinte ligazón web da Consellería:
http://ceei.xunta.gal/transparencia/documentos-sometidos-a-informacion-publica
Ourense, 29 de xuño de 2022
O xefe territorial de Ourense
P.S.L. (Decreto 230/2020, artigo 36.3)
José Rodríguez Paz
Xefe do Servizo de Enerxía e Minas
ANEXO
Relación de bens e de dereitos afectados
Número de expediente: IN407A 2022/91-3.
Concello: Rubiá.
Denominación: regulamentación LAT, 132 kV, San Martín-Carucedo D.A.R. AP.100.
Predio número en proxecto: 1.
Paraxe: Pinguela.
Cultivo: monte alto.
Titular: herdeiros de Aurora Fernández Núñez.
Afeccións: apoio núm. 100N, cunha superficie de ocupación de 13,39 m2.
