Primeiro. O artigo 91 da Lei 3/2012, do 2 de abril, do deporte de Galicia, configura o Comité Galego de Xustiza Deportiva como o órgano administrativo superior da xurisdición deportiva no ámbito territorial da Comunidade Autónoma de Galicia. Está adscrito ao órgano da Administración autonómica competente en materia de deporte e actúa con independencia funcional deste e da Administración xeral da Comunidade Autónoma.
Segundo. A composición do Comité Galego de Xustiza Deportiva regúlase no artigo 92 da Lei 3/2012, do 2 de abril, do deporte de Galicia, e no artigo 4 do Decreto 120/2013, do 24 de xullo, polo que se aproba o Regulamento do Comité Galego de Xustiza Deportiva. De conformidade con estes preceptos, o Comité Galego de Xustiza Deportiva está integrado por un presidente e catro vogais, todos eles licenciados/as en Dereito.
Terceiro. A competencia para o nomeamento dos membros do Comité Galego de Xustiza Deportiva, titulares e suplentes, correspóndelle ao órgano da Administración autonómica competente en materia deportiva.
Cuarto. Mediante a Resolución do 27 de outubro de 2020, da Secretaría Xeral para o Deporte (DOG núm. 224, do 5 de novembro), nomeáronse os membros titulares e suplentes do Comité Galego de Xustiza Deportiva.
Quinto. Mediante escrito dirixido á Secretaría Xeral para o Deporte presentou, ao abeiro do artigo 8 do Decreto 120/2013, do 24 de xullo, polo que se aproba o Regulamento do Comité Galego de Xustiza Deportiva, a súa renuncia voluntaria á condición de membro do Comité Galego de Xustiza Deportiva a vogal titular Carmen José López Rodríguez.
Deste xeito, aceptada a renuncia, faise necesario ditar a presente resolución para nomear un novo membro do Comité Galego de Xustiza Deportiva.
Por todo o exposto e en uso das competencias atribuídas polo Decreto 117/2022, do 23 de xuño, polo que se establece a estrutura orgánica da Vicepresidencia Segunda e Consellería de Presidencia, Xustiza e Deportes da Xunta de Galicia,
RESOLVO:
Primeiro. Nomear como membro titular do Comité Galego de Xustiza Deportiva a Jorge Barros de la Peña.
Segundo. Ordenar a publicación desta resolución no Diario Oficial de Galicia.
Contra esta resolución poderase interpoñer, potestativamente, recurso de reposición ante a Secretaría Xeral para o Deporte no prazo dun mes contado desde o día seguinte ao da súa publicación, de conformidade co establecido no artigo 123 da Lei 39/2015, do 1 de outubro, do procedemento administrativo común das administracións públicas, ou interpoñer directamente recurso contencioso-administrativo ante o Tribunal Superior de Xustiza de Galicia, no prazo de dous meses, de conformidade co establecido no artigo 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 8 de xullo de 2022
José Ramón Lete Lasa
Secretario xeral para o Deporte