O Pleno da Corporación, en sesión que tivo lugar o día 30.6.2022, adoptou o seguinte acordo:
Primeiro. Aprobar definitivamente o plan parcial do sector de solo urbanizable delimitado S-1.I (Coeses-Cuíña), formulado pola entidade mercantil Novafrigsa, S.A. e redactado pola mercantil Servicat Arquitectura y Urbanismo, S.L., de conformidade cos informes sectoriais emitidos no presente procedemento, co informe conxunto dos Servizos Municipais de Arquitectura, Enxeñaría e Medio Ambiente emitido con data do 16.6.2022 e co informe do Servizo Municipal de Urbanismo emitido con data do 17.6.2022.
Segundo. Proceder á publicación deste acordo de aprobación definitiva no DOG, no prazo dun mes desde a súa adopción. Xunto coa publicación deste acordo publicarase a referencia ao enderezo electrónico no que figurará o contido íntegro deste Plan parcial a disposición do público (artigo 82.2 da LSG).
Terceiro. Unha vez publicado o anuncio no DOG a que fai referencia o anterior acordo, proceder á remisión dun exemplar deste Plan parcial en soporte dixital, debidamente dilixenciado, á Consellería de Medio Ambiente, Territorio e Vivenda (CMATV) para a súa inscrición no Rexistro de Planeamento Urbanístico de Galicia. Sendo esta inscrición requisito de eficacia do acordo de aprobación definitiva (artigo 88 da LSG). Posteriormente, procederase á publicación do anuncio no BOP, conforme o establecido nos artigos 82.3 e 88.4 da LSG.
Cuarto. Notificarlles este acordo aos interesados, indicándolles que contra el poderán interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia (artigo 10 da Lei 29/1998, do 13 de xullo) nun prazo de dous meses, contados a partir do día seguinte ao da notificación do presente acto, o cal pon fin á vía administrativa (artigo 46 da Lei 29/1998, do 13 de xullo), sen prexuízo de que poidan interpoñer calquera outro recurso ou reclamación que consideren conveniente ao seu dereito.
O contido íntegro do documento aprobado poderá consultarse na seguinte ligazón:
http://concellodelugo.gal/gl/actuacions/normativa-urbanistica
Lugo, 8 de xullo de 2022
A alcaldesa
P.D. (Decreto 2973/2021)
Álvaro Santos Ramos
Tenente de alcaldesa delegado
da Área de Sostibilidade Urbana
