Examinada a solicitude de deslinde formulada polos representantes do MVMC Sobral ou Comunal de Queirugás, pertencente á CMVMC de Queirugás, A Rasela, Vilela e Tintores, no concello de Verín, e o de Valdeguas, pertencente á CMVMC da Trepa, no concello de Riós, resultan os seguintes
Feitos:
Primeiro. O día 21 de marzo de 2022 a CMVMC de Queirugás, A Rasela, Vilela e Tintores presentou un escrito (Rexel núm. 2022/749354) en que solicita que se tramite o deslindamento realizado entre os MVMC Sobral ou Comunal de Queirugás e o de Valdeguas.
Coa solicitude achegou a seguinte documentación:
– Acta de deslindamento.
– Memoria descritiva con planos topográficos.
– Acta de conciliación levantada no Xulgado de Primeira Instancia de Verín.
– Certificacións de aprobación das dúas comunidades.
– Arquivos shape.
Segundo. O informe do Servizo de Montes da Xefatura Territorial de Ourense do 29 de marzo de 2022 fai constar que a documentación achegada corresponde ao deslindamento dun pequeno tramo do perímetro estremeiro entre o MVMC de Valdeguas, pertencente á CMVMC da Trepa, e o MVMC Sobral ou Comunal de Queirugás, pertencente á CMVMC de Queirugás, A Rasela, Vilela e Tintores.
En concreto, trátase do subtramo comprendido aproximadamente entre os vértices número 2 e 5 dun deslindamento aprobado polo Xurado Provincial o día 29 de maio de 2018, o cal definiu con precisión a liña que deslinda ambos os dous montes (entre outros). A nova proposta simplifica a de 2018, eliminando os vértices 3 e 4 desta última.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia.
Consideracións legais e técnicas:
Primeiro. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 29 de marzo de 2022, o Xurado Provincial de Montes Veciñais en Man Común acordou por unanimidade o día 31 de maio de 2022:
– Aprobar o acto de conciliación acadado polas xuntas reitoras dos MVMC Sobral ou Comunal de Queirugás, pertencente á CMVMC de Queirugás, A Rasela, Vilela e Tintores, no concello de Verín, e o de Valdeguas, pertencente á CMVMC da Trepa, no concello de Riós.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 17 de xuño de 2022
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense
