No Xulgado do Contencioso-Administrativo número 2 de Vigo tramítase o procedemento ordinario número 66/2022 interposto polo Colexio Oficial de Licenciados en Educación Física e en Ciencias da Actividade Física e do Deporte contra a Resolución do 2 de decembro de 2021 pola que se acorda publicar a relación de postos de traballo do persoal de administración e servizos da Universidade de Vigo.

Con data do 19.5.2022, o devandito xulgado dita auto logo de estimar a solicitude de ampliación do recurso á Resolución do 8 de abril de 2022 desestimatoria de recurso de reposición contra a Resolución do 10 de febreiro de 2022 pola que se convocan, para o persoal laboral fixo de administración e servizos, os procesos selectivos para a adquisición da condición de funcionario de carreira nas escalas e subescalas propias da Universidade de Vigo.

O que se notifica para xeral coñecemento de todas as persoas interesadas no procedemento, que son emprazadas para que poidan comparecer no xulgado no prazo de nove días, contados a partir do seguinte ao da publicación desta resolución no Diario Oficial de Galicia, de conformidade co previsto no artigo 49 da Lei 29/1998, do 13 de xullo, reguladora da xurisdición contencioso-administrativa.

Vigo, 26 de maio de 2022

Manuel Joaquín Reigosa Roger
Reitor da Universidade de Vigo