Mediante a Resolución do 21 de marzo de 2022 (DOG do 30 de marzo) convócase concurso público para a elaboración de listas de espera de persoal docente e investigador contratado interino. Na norma 1.4 do citado concurso establécese que o prazo máximo para a resolución do concurso será de 3 meses contados a partir da data de publicación da convocatoria no Diario Oficial de Galicia, prazo que remata o 30 de xuño de 2022.
O dito concurso coincide temporalmente coa convocatoria publicada pola Resolución do 14 de marzo de 2022 (DOG do 28 de marzo) de prazas de profesorado axudante doutor e asociado, que inclúe un total de 98 concursos, que precisan, con carácter previo á actuación das comisións de selección, dun traballo administrativo de preparación das solicitudes e de revisión da documentación acreditativa dos méritos alegados polos aspirantes, o que require unha forte dedicación de recursos e tempo.
Á vista do estado actual dos traballos administrativos previos á actuación das comisións de selección, e tendo en conta que estas deben dispoñer dun tempo axeitado para desenvolver as súas actuacións, considérase necesario ampliar o prazo máximo previsto para a resolución completa da convocatoria.
Por esta razón, esta reitoría
RESOLVE:
Único. Ampliar ata o día 29 de xullo o prazo máximo para resolver o concurso convocado pola Resolución do 21 de marzo de 2022 (DOG do 30 de marzo), pola que se convoca concurso público para a elaboración de listas de espera de persoal docente e investigador contratado interino.
Santiago de Compostela, 25 de maio de 2022
O reitor da Universidade de Santiago de Compostela
P.D. (Resolución do 21.4.2022, DOG do 26 de abril)
Ernesto González Seoane
Vicerreitor de Profesorado