A Xunta de Goberno Local, na sesión ordinaria do 13 de abril de 2022, adoptou o seguinte acordo:

«Primeiro. Prestar aprobación inicial ao Plan especial de reforma interior UA 3. Montana», instrumento urbanístico de iniciativa particular promovido por Arqura Homes fondos de activos bancarios, con CIF V8835928 (tras a subrogación e cambio de titularidade efectuada neste expediente con data do 21 de xaneiro de 2020), que inclúe a documentación técnica presentada en soporte dixital e sinatura válida polos arquitectos redactores Simón Pereiro López-Quecuty e José Luis Pereiro Alonso no Rexistro electrónico da Xerencia Municipal de Urbanismo con datas do 1 de xullo de 2021 (cód. sol.: W573195-3915), 21 de xullo de 2021 (cód. sol.: W580466-3085) e 10 de marzo de 2022 (cód. sol. W668665-5559); esta última substitúe a normativa urbanística do mesmo documento anterior.

Segundo. Someter a información pública este expediente, incluído o resumo executivo, polo prazo de dous (2) meses, mediante a publicación de anuncios no DOG, nun dos xornais de maior circulación da provincia e na sede electrónica do Concello de Vigo, para efectos de que durante o dito período se poidan formular alegacións e as suxestións pertinentes. O remate do referido prazo de alegacións computarase desde a data da publicación do anuncio no Diario Oficial de Galicia, e a documentación exposta será dilixenciada pola Secretaría Xeral, con notificación individual ás persoas titulares catastrais dos terreos afectados segundo a relación catastral incorporada ao expediente.

Durante o referido prazo recadaranse os informes sectoriais que resulten preceptivos, de conformidade coa normativa urbanística e sectorial de aplicación.

Á vista do resultado dos trámites anteriores, resolverase sobre a procedencia de introducir no documento de modificación as rectificacións pertinentes, cuxo alcance determinará, de ser o caso, a oportunidade e procedencia dun novo trámite de información pública e requirimento de informes (artigo 144.12 do Regulamento da Lei do solo de Galicia).

Terceiro. Este acordo determina, por aplicación do disposto nos artigos 47.2 da Lei do solo de Galicia e 86.2 do Regulamento da Lei do solo de Galicia, a suspensión do procedemento de outorgamento de licenzas no ámbito afectado no que resulte incompatible coa nova ordenación».

Para os efectos do disposto no punto segundo da parte dispositiva deste acordo, a documentación íntegra aprobada inicialmente poderase consultar na seguinte ligazón: https://hoxe.vigo.org/movemonos/urbanismo_pxom2.php?lang=gal#/ e no Departamento de Información de Urbanismo, sito na planta baixa do edificio da Xerencia de Urbanismo (praza do Rei, s/n, Vigo), para a súa consulta e a presentación de cantos documentos ou escritos de alegacións xulguen convenientes.

* Pódense poñer en contacto co Departamento de Información de Urbanismo, para solicitar cita previa ou para resolver calquera dúbida ao respecto, no teléfono 986 81 03 49.

* Para presentar documentos ou escritos de alegacións, deben solicitar cita previa no Rexistro de Urbanismo no teléfono 986 81 03 44.

Vigo, 22 de abril 2022

O presidente da Xerencia Municipal de Urbanismo
P.D. (Resolución do 11.7.2019)
María José Caride Estévez
Vicepresidenta da Xerencia Municipal de Urbanismo