Visto o expediente de extinción da Fundación Fiemirt-Fundación para la Investigación de Enfermedades Microbiológicas, Reumatológicas y Tumorales, dítase esta orde baseada nos feitos e fundamentos de dereito que se expoñen a seguir.
Feitos:
Primeiro. O 22 de outubro de 2021, Víctor Félix Lueiro Lores, na súa condición de presidente do padroado da Fundación Fiemirt-Fundación para la Investigación de Enfermedades Microbiológicas, Reumatológicas y Tumorales, solicita a ratificación polo protectorado do acordo de extinción adoptado polo órgano de goberno o 24 de setembro de 2021.
Segundo. O artigo 38 da Lei 12/2006, do 1 de decembro, de fundacións de interese galego, así como os preceptos concordantes do Decreto 14/2009, do 21 de xaneiro, polo que se aproba o Regulamento de fundacións de interese galego, establecen a obriga destas de render contas. A última documentación contable que consta depositada no Rexistro de Fundacións de Interese Galego corresponde ao exercicio 2011 para o que foi preciso solicitar a súa actualización mediante os requirimentos realizados en distintas datas que finalizaron coa presentación o 6 de maio de 2022 das contas dos exercicios 2012-2021.
Terceiro. A Fundación Fiemirt-Fundación para la Investigación de Enfermedades Microbiológicas, Reumatológicas y Tumorales constituíuse en escritura pública outorgada en Pontevedra, o día 21 de xaneiro de 1999, ante o notario Rafael Sanmartín Losada, co número cento vinte e un do seu protocolo; clasificouse de interese sanitario pola Orde da Consellería da Presidencia e Administración Pública do 5 de outubro de 1999 (DOG número 203, do 20 de outubro); declarouse de interese galego pola Orde da Consellería de Sanidade e Servizos Sociais do 27 de outubro de 1999 (DOG número 226, do 23 de novembro) e está inscrita no Rexistro de Fundacións de Interese Galego, Sección da Consellería de Sanidade, co número 24.
Cuarto. Segundo consta no artigo 6 dos seus estatutos, a fundación ten como obxectivo a investigación sanitaria nos campos da microbioloxía clínica, reumatoloxía e tumorais. Tamén a organización de cursos, congresos e simposios, así como a elaboración de teses cun contido que se corresponda cos campos de investigación propios dos fins da fundación.
Quinto. O padroado da fundación, na súa reunión do 24 de setembro de 2021, adoptou, por unanimidade dos seus membros, o acordo de extinción da fundación motivado na imposibilidade de realizar o fin fundacional.
No expediente tramitado consta a seguinte documentación:
• Certificación do secretario, co visto e prace do presidente, en que consta o acordo de extinción adoptado pola unanimidade do padroado na reunión do 24 de setembro de 2021.
• Memoria xustificativa en que consta como causa de extinción, que o padroado considerou por unanimidade, que nin a reforma dos estatutos nin a fusión con outra fundación puidesen solucionar os actuais problemas da Fundación. Tamén indica que, xunto coas razóns xerais e científicas, as causas fundamentais que impiden a consecución dos obxectivos fundacionais son a falta de medios económicos e os efectos da xubilación de membros do padroado que fai materialmente inviable a continuidade da fundación.
• As contas da fundación na data en que o padroado adoptou o acordo de extinción.
• Proxecto de distribución dos bens e dereitos resultantes da liquidación: de acordo coa certificación do secretario do padroado do 24 de setembro de 2021 serían destinados á entidade Médicos sin Fronteras. Non obstante, da documentación que consta no expediente despréndese que non hai bens resultantes da liquidación segundo a declaración da fundación de que non ten operacións comerciais pendentes, nin bens sociais que houbera que allear, nin créditos ou dividendos pasivos pendentes, nin tampouco acredores.
Fundamentos de dereito:
Primeiro. A Consellería de Sanidade exerce o protectorado sobre a Fundación Fiemirt-Fundación para la Investigación de Enfermedades Microbiológicas, Reumatológicas y Tumorales, de conformidade co disposto no Decreto 41/2013, do 21 de febreiro, polo que se establece a estrutura orgánica da Consellería de Sanidade, en relación co artigo 47 da Lei 12/2006, do 1 de decembro, de fundacións de interese galego.
De acordo co disposto no artigo 7.2.b) do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, correspóndelle á Consellería de Sanidade a inscrición na sección correspondente do Rexistro de Fundacións de Interese Galego de todos os actos relativos ás fundacións sobre as que exerza as funcións de protectorado.
Segundo. O artigo 44.1.c) da Lei 12/2006, do 1 de decembro, de fundacións de interese galego, establece entre as causas de extinción das fundacións, a imposibilidade de realizar o fin fundacional, e para este efecto é necesario o acordo favorable do padroado, ratificado polo protectorado.
Terceiro. Este acordo de extinción adoptouse de conformidade cos requisitos establecidos na normativa vixente e nos estatutos da fundación e foi aprobado por unanimidade do padroado. No expediente tramitado consta a memoria xustificativa das causas de extinción e demais documentación establecida no artigo 44 da Lei 12/2006, do 1 de decembro, de fundacións de interese galego, e no artigo 48 do Decreto 14/2009, do 2 de xaneiro, polo que se aproba o Regulamento de fundacións de interese galego.
Cuarto. O acordo de extinción das fundacións está incluído entre os actos suxeitos a inscrición polo Rexistro de Fundacións de Interese Galego, segundo os artigos 44.6 e 54.e) da Lei 12/2006; e 21.k) do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego.
Polo exposto, e de conformidade co establecido na Lei 12/2006, do 1 de decembro, de fundacións de interese galego, e nos decretos 14/2009, do 21 de xaneiro, polo que se aproba o Regulamento de fundacións de interese galego, e 15/2009, da mesma data, polo que se aproba o Regulamento do Rexistro de Fundacións de Interese Galego, e demais normativa de xeral aplicación,
DISPOÑO:
Primeiro. Ratificar o acordo de extinción adoptado polo padroado da Fundación Fundación Fiemirt-Fundación para la Investigación de Enfermedades Microbiológicas, Reumatológicas y Tumorales na súa reunión do 24 de setembro de 2021.
Segundo. Ordenar a inscrición do acordo de extinción da Fundación Fundación Fiemirt-Fundación para la Investigación de Enfermedades Microbiológicas, Reumatológicas y Tumorales no Rexistro de Fundacións de Interese Galego, sección da consellería de Sanidade.
Contra esta orde, que pon fin á vía administrativa, poderá interpoñerse recurso contencioso-administrativo ante o Tribunal Superior de Xustiza de Galicia, no prazo de dous meses, contados desde o día seguinte ao da súa notificación ou publicación, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de que, con carácter potestativo, poida interpoñerse recurso de reposición ante o conselleiro de Sanidade, no prazo dun mes, contado desde o día seguinte ao da súa notificación ou publicación, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 11 de maio de 2022
O conselleiro de Sanidade
P.D. (Orde do 25.5.2020; DOG nº 103, do 29 de maio)
Alberto Fuentes Losada
Secretario xeral técnico da Consellería de Sanidade