De conformidade co artigo 8 da Lei 19/2013, do 9 de setembro, de transparencia, acceso á información pública e bo goberno, dáse publicidade das seguintes encargas ao medio propio:
1. Resolución do 9 de decembro de 2021, da Consellería do Medio Rural, pola que se lle encarga ao medio propio Empresa Pública de Servizos Agrarios Galegos, S.A. (Seaga) o control da avespiña do castiñeiro (Dryocosmus kuriphilus), mediante loita biolóxica coa solta de Torymus sinensis e seguimento da súa parasitación, en soutos da Comunidade Autónoma de Galicia no ano 2022, cofinanciada con Feader no marco do PDR de Galicia 2014-2020. Expediente tramitado como anticipado de gasto.
– Actividade: execución dos tratamentos sobre as masas de castiñeiros galegos, mediante o estudo, seguimento e solta experimental dentro do programa de control biolóxico de Dryocosmus kuriphilus (Yasumatsu, 1951) mediante o parasitoide Torymus sinensis (Kamijo, 1983). A solta do parasitoide Torymus sinensis realizarase na primavera de 2022, xunto coa determinación do grao de agromo óptimo das distintas variedades de castiñeiro. Para determinar o grao de parasitación, executarase a recollida de bugallas en outono para proceder ao seu posterior diagnóstico en laboratorio, así como á realización de prospeccións para determinar o grao de ataque e determinar a súa expansión e presenza na comunidade autónoma.
– Natureza e alcance da xestión encomendada: encomenda de xestión a medios propios ao ter a Empresa Pública de Servizos Agrarios Galegos, S.A. (Seaga) a consideración de medio propio instrumental e de servizo técnico da Administración xeral da Comunidade Autónoma de Galicia, en cumprimento do establecido nos artigos 10, 47 e seguintes da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
– Prazo de vixencia: desde o día 1 de xaneiro de 2022 ata o 31 de decembro de 2022.
– Financiamento: tramitouse con cargo aos orzamentos da Comunidade Autónoma de Galicia para o ano 2022; o orzamento de execución ascende á cantidade de un millón seiscentos oitenta e cinco mil novecentos corenta e tres euros con once céntimos (1.685.943,11 €) con cargo á aplicación orzamentaria 14.03.713B 604.6 (código de proxecto 2016 00199).
2. Resolución do 22 de decembro de 2021, da Consellería do Medio Rural, pola que se lle encarga ao medio propio Empresa Pública de Servizos Agrarios Galegos, S.A. (Seaga) o apoio á conservación e o fomento dos recursos xenéticos forestais para a recollida e procesado de semente forestal de alto valor xenético na Comunidade Autónoma de Galicia durante o primeiro cuadrimestre de 2022, cofinanciada polo Fondo Europeo Agrícola de Desenvolvemento Rural (Feader) no marco do PDR de Galicia 2014-2020. Expediente tramitado como anticipado de gasto.
– Actividade: traballos relativos á recollida de sementes mediante distintos métodos e transporte para o seu almacenamento e o seu posterior tratamento. Os labores relacionados son os seguintes:
– Recollida de sementes e corta de árbores.
– Recollida das sementes en árbores en pé.
– Almacenaxe e transporte dos froitos á instalación.
– Secado e procesado das sementes recollidas.
Conservación dos hortos de semente do Catálogo de materias de base.
– Natureza e alcance da xestión encomendada: encomenda de xestión a medios propios ao ter a Empresa Pública de Servizos Agrarios Galegos, S.A. (Seaga) a consideración de medio propio instrumental e de servizo técnico da Administración xeral da Comunidade Autónoma de Galicia, en cumprimento do establecido nos artigos 10, 47 e seguintes da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
– Prazo de vixencia: desde o 1 de xaneiro de 2022 ata o 30 de abril de 2022.
– Financiamento: tramitouse con cargo aos orzamentos da Comunidade Autónoma de Galicia para o ano 2022; o orzamento de execución ascende á cantidade de sesenta e dous mil catrocentos noventa e dous euros con cincuenta e oito céntimos (62.492,58 €) con cargo á aplicación orzamentaria 14.03.713B 604.1 (código de proxecto 2016 00201).
Santiago de Compostela, 29 de abril de 2022
José González Vázquez
Conselleiro do Medio Rural
