Como consecuencia da entrada en vigor da Lei 7/2012, do 28 de xuño, de montes de Galicia, e coa finalidade de levar a cabo o establecido na disposición transitoria décimo terceira con respecto á revisión de esbozos de montes veciñais en man común, o xurado, na reunión do 17.9.2012, acordou solicitarlle ao Servizo de Montes a realización de propostas de revisión e elaboración de cartografías actualizadas dos montes veciñais da provincia, susceptibles de tal adecuación.
En relación con isto, na sesión realizada polo xurado provincial o día 31.3.2022 figuran os seguintes acordos:
– MVMC Cebres (expediente 30/77), pertencente aos veciños do lugar de León, parroquia de León, concello de Portomarín.
O 22.7.2020 tivo entrada unha solicitude da Comunidade de León, para que se proceda á revisión do esbozo do monte veciñal, conforme a documentación que achega.
O 26.11.2021, o Servizo de Montes elabora unha proposta de novo esbozo (2020_32) na cal a superficie do monte Cebres pasa a ser 41,0606 hectáreas.
Examinada a dita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo I, que se insire ao final deste anuncio.
– MVMC Común e Lameiros (expediente 73/80), pertencente aos veciños da parroquia de Santa Cristina de Paradela, concello de Paradela.
Os días 29.6.2021 e 30.6.2021 tivo entrada unha solicitude da Comunidade de Santa Cristina de Paradela para que se proceda á revisión do esbozo do monte veciñal, conforme a documentación que achega.
O 11.3.2022, o Servizo de Montes elabora unha proposta de novo esbozo (2021_24) na cal a superficie do monte de Común e Lameiros pasa a ser de 17,1987 hectáreas. Esta revisión de esbozo ten en conta o deslindamento co MVMC Alto da Serra.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo II, que se insire ao final deste anuncio.
– MVMC Alto da Serra (expediente 73/80), pertencente aos veciños do lugar da Serra, parroquia de Santa Cristina de Paradela, concello de Paradela.
Os días 29.6.2021 e 30.6.2021 tivo entrada unha solicitude da Comunidade da Serra, para que se proceda á revisión do esbozo do monte veciñal, conforme a documentación que achega.
O 22.3.2022 o Servizo de Montes elabora unha proposta de novo esbozo (2021_25) na cal a superficie do monte de Alto da Serra pasa a ser de 16,3479 hectáreas. Esta revisión de esbozo ten en conta o deslindamento co MVMC Común e Lameiros.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo III, que se insire ao final deste anuncio.
– Monte Coea (expediente 94/77), pertencente aos veciños do lugar de Coea, parroquia de Castañedo, no concello de Navia de Suarna.
O día 16.3.2022 tivo entrada unha solicitude da Comunidade de Coea (mellorada o 25.3.2022) para que se proceda á revisión do esbozo do monte veciñal, conforme a documentación que achega.
O 28.3.2022, o Servizo de Montes elabora unha proposta de novo esbozo (2022_10) na cal a superficie do monte de Coea pasa a ser de 253,8429 hectáreas.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo IV, que se insire ao final deste anuncio.
Contra estes acordos, desde o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e co artigo 46 da Lei 29/1998, do 13 de xullo, da xurisdición contencioso-administrativa.
Lugo, 20 de abril de 2022
Mª Olga Iglesias Fontal
Presidenta do Xurado Provincial de Clasificación de
Montes Veciñais en Man Común de Lugo
