Por Acordo do 14 de decembro de 2021, desta xefatura territorial, sometéronse a información pública (DOG núm. 243, do 21 de decembro) as solicitudes de autorización administrativa previa e de construción, o estudo de impacto ambiental e o proxecto sectorial de incidencia supramunicipal (de interese autonómico) en relación co proxecto de modificación do parque eólico Mondigo, nos concellos de Trabada e Ribadeo (expediente LU-11/133-EOL).

De acordo co establecido no artigo 43 da Lei 5/2017, do 19 de outubro, de fomento de implantación de iniciativas empresariais en Galicia, o Consello da Xunta de Galicia, na súa reunión do 2 de setembro de 2021, acordou declarar iniciativa empresarial prioritaria o referido parque eólico e, con base nos artigos 44 da mencionada Lei 5/2017, do 19 de outubro, e 33 da Lei 39/2015, do 1 de outubro, do procedemento administrativo común das administracións públicas, o 17 de setembro de 2021 a Dirección Xeral de Planificación Enerxética e Recursos Naturais resolveu declarar a tramitación de urxencia dos procedementos administrativos correspondentes ao parque eólico, o que supón a redución á metade dos prazos establecidos para o procedemento ordinario, salvo os relativos á presentación de solicitudes e recursos. Por este motivo, a citada información pública fíxose polo prazo de 15 días.

Non obstante o anterior, vista a Sentenza núm. 18/2022, do Tribunal Superior de Xustiza de Galicia, aínda que esta non adquiriu firmeza, con base no principio de seguridade xurídica sométese de novo a información pública por un prazo de 30 días a solicitude de autorización administrativa previa e de construción, o estudo de impacto ambiental e o proxecto sectorial de incidencia supramunicipal (de interese autonómico) en relación co proxecto de modificación do parque eólico Mondigo, situado nos concellos de Trabada e Ribadeo (Lugo) e promovido por Esus Energía Renovable, S.L. (expediente LU-11/133-EOL).

Antecedentes.

Mediante a Resolución do 7 de xaneiro de 2014, da Dirección Xeral de Enerxía e Minas, autorízanse as instalacións, apróbase o proxecto de execución e declárase a utilidade pública, en concreto, así como a compatibilidade con diversos dereitos mineiros, do parque eólico Mondigo, situado nos concellos de Trabada, Barreiros e Ribadeo (DOG núm. 74, do 16 de abril).

O 23 de febreiro de 2021, Esus Energía Renovable, S.L. presentou unha solicitude de autorización administrativa previa e de construción de instalacións de produción de enerxía eléctrica e as súas infraestruturas de evacuación (procedemento IN408A), para a modificación do proxecto denominado parque eólico Mondigo (expediente LU-11/133-EOL), ao abeiro da Lei 8/2009, do 22 de decembro, pola que se regula o aproveitamento eólico en Galicia e se crean o canón eólico e o Fondo de Compensación Ambiental.

O 26 de outubro de 2021, a Dirección Xeral de Planificación Enerxética e Recursos Naturais achegou a esta xefatura territorial os trámites por ela realizados xunto co expediente, que cualifica a modificación formulada pola empresa para o proxecto como substancial, para continuar coa tramitación.

De acordo co exposto, en cumprimento do establecido na Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental (modificada pola Lei 5/2017, do 19 de outubro, de fomento da implantación de iniciativas empresariais en Galicia, e pola Lei 9/2021, do 25 de febreiro, de simplificación administrativa e de apoio á reactivación económica de Galicia); na Lei 24/2013, do 26 de decembro, do sector eléctrico, e no Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica; na Lei 21/2013, do 9 de decembro, de avaliación ambiental; na Lei 1/2021, do 8 de xaneiro, de ordenación do territorio de Galicia, e demais normas vixentes de aplicación, sométese a información pública a solicitude relacionada coa instalación que se describe a continuación:

Solicitante/promotora: Esus Energía Renovable, S.L.

Domicilio social: avenida Diagonal, 407 bis, planta 11, 08008 Barcelona.

Denominación do proxecto: proxecto de execución de modificación do parque eólico Mondigo.

Situación: concellos de Trabada e Ribadeo (Lugo).

Áreas de desenvolvemento eólico: (ADE): Mondigo.

Potencia instalada: 45 MW.

Número de aeroxeradores que se van instalar: 13.

Produción neta anual estimada: 148.057 MW h/ano.

Orzamento de execución material: 29.612.524,97 €.

Coordenadas perimétricas da poligonal do parque eólico:

Vértice	Datum ETRS89 (fuso 29)
UTM-X	UTM-Y
M1	649.877,641	4.812.808,637
M2	652.209,541	4.812.808,637
M3	652.209,541	4.817.011,807
M4	643.310,606	4.817.011,807
M5	643.310,606	4.811.581,635
M6	647.213,571	4.811.581,635

Coordenadas de localización dos aeroxeradores:

Aeroxerador	Datum ETRS89 (fuso 29)		Concello
UTM-X	UTM-Y
1	650.648	4.813.154	Trabada
2	650.691	4.813.721	Trabada
3	650.731	4.814.128	Trabada
4	650.318	4.814.223	Trabada
5	650.771	4.815.232	Ribadeo
6	650.396	4.815.251	Ribadeo
7	649.606	4.815.462	Ribadeo
8	649.455	4.816.127	Ribadeo
9	647.147	4.813.299	Trabada
10	646.722	4.813.306	Trabada
11	646.460	4.813.535	Trabada
12	646.298	4.813.836	Trabada
13	645.716	4.814.342	Trabada

Coordenadas de localización da SET:

Vértice	Datum ETRS89 (fuso 29)
UTM-X	UTM-Y
1	645.623,709	4.814.441,986
2	645.684,303	4.814.445,848
3	645.686,055	4.814.418,346
4	645.649,018	4.814.415,986
5	645.648,658	4.814.421,622
6	645.625,093	4.814.420,257

Características técnicas principais das instalacións:

– Trece (13) aeroxeradores, modelo GE137 3.8 MW do fabricante General Electric, de 3.800 kW de potencia nominal, que deberá de ser convenientemente limitada para que a potencia nominal instalada non supere os 45 MW. Os aeroxeradores terán unha altura de buxeiro de 110 metros e un diámetro de rotor de 137 metros.

– Trece (13) centros de transformación, instalados unitariamente no interior de cada aeroxerador, de 4.126 kVA de potencia aparente e relación de transformación 0,69/30 kV coa súa correspondente aparellaxe de seccionamento, manobra e protección.

– Rede colectora soterrada de 30 kV, formada por tres circuítos con condutor tipo AL HEPRZ1 18/30 kV, para a interconexión dos centros de transformación 0,69/30 kV coa SET 30/132 kV do parque, co obxecto de evacuar a enerxía xerada. A rede tamén conta, para a sinalización e manobra do parque desde o edificio de control, con cable óptico tipo monomodo (9/125µm) ou multimodo (50/125 µm), segundo as distancias.

– Subestación eléctrica transformadora (SET) parque eólico Mondigo 30/132 kV, con edificio de control, transformador de potencia trifásico de 55/62,5 MVA ONAN/ONAF, transformador de servizos auxiliares de 400 kVA de potencia nominal e relación de transformación 30/0,4 kV, así como grupo electróxeno de 68 kVA 400/230 V e 50 Hz, equipos de seccionamento, medida, protección, telemando e demais elementos auxiliares. O recinto da SET atopase no concello de Trabada (Lugo).

Órgano competente: o órgano competente para autorizar o proxecto da referida instalación eléctrica é a Dirección Xeral de Planificación Enerxética e Recursos Naturais.

Procedemento de avaliación ambiental: o proxecto da referida instalación eléctrica está suxeito a avaliación de impacto ambiental ordinaria, segundo o establecido no artigo 7.1.a) da Lei 21/2013, do 9 de decembro, de avaliación ambiental.

Obxecto da información pública:

– Proxecto de execución, modificación (de novembro de 2021), das instalacións para os efectos da súa autorización administrativa previa e de construción.

– Estudo de impacto ambiental, modificación (de outubro de 2021).

– Proxecto sectorial de incidencia supramunicipal (de interese autonómico), modificación (de xaneiro de 2021).

O que se fai público, de conformidade co artigo 33 da Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental, e demais normas anteriormente citadas, para coñecemento xeral, e para que todas aquelas persoas, naturais ou xurídicas, que se consideren afectadas nos seus dereitos ou intereses, poidan examinar a documentación técnica anteriormente relacionada e, se é o caso, presentar as alegacións que consideren oportunas dentro do prazo de trinta (30) días, que se contarán a partir do día seguinte ao da última publicación deste acordo.

A documentación estará á disposición das persoas interesadas en formato electrónico, nas dependencias da Sección de Enerxía da Xefatura Territorial de Lugo da Vicepresidencia Segunda e Consellería de Economía, Empresa e Innovación (rolda da Muralla, núm. 70, baixo 2º, 27071 Lugo), das 9.00 ás 14.00 horas, de luns a venres, con cita previa no correo electrónico enerxia.lugo@xunta.gal ou nos teléfonos 982 29 46 54 e 982 88 90 87), así como nos concellos de Trabada e Ribadeo (Lugo).

Ademais, poderase consultar no portal web da Vicepresidencia Segunda e Consellería de Economía, Empresa e Innovación na seguinte ligazón:

https://ceei.xunta.gal/transparencia/parque-eolico/mondigo

Lugo, 18 de marzo de 2022

Gustavo J. Casasola de Cabo
Xefe territorial de Lugo