O 1 de marzo de 2022 publicouse no Diario Oficial de Galicia a Orde do 21 de febreiro de 2022 sobre delegación de competencias en diversos órganos de dirección da Consellería do Mar e na Presidencia da entidade pública empresarial Portos de Galicia.

O artigo 5.1, en relación coas axudas e subvencións, establece que o réxime de delegación en materia de axudas e subvencións públicas no ámbito da Consellería será o que se estableza nas correspondentes ordes de convocatoria.

A entrada en vigor desta nova orde de delegación deixa fóra deste réxime de delegación unha gran parte das convocatorias de axudas e subvencións da Consellería do Mar que se tramitaron como anticipado de gasto de acordo co disposto na Orde do 11 de febreiro de 1998, da Consellería de Economía e Facenda, pola que se regula a tramitación anticipada dos expedientes de gasto. Ademais, algunhas ordes de axudas tramitadas en anos anteriores conteñen plurianualidades asociadas. A resolución destas axudas corresponde á persoa titular da Consellería e non está prevista nelas a delegación na persoa titular da dirección xeral competente segundo a materia.

Para acadar unha maior axilidade e evitar a acumulación de tarefas na persoa titular da Consellería, parece aconsellable modificar a orde de delegación de competencias neste artigo concreto, de maneira que a competencia para resolver os procedementos de axudas e subvencións que se tramiten no ámbito das súas competencias quede delegado nas persoas titulares dos centros directivos.

Por outra banda, o artigo 10.3.a) da Orde do 21 de febreiro de 2022 delega na Presidencia da entidade pública empresarial Portos de Galicia o exercicio da facultade de aprobar os plans de utilización dos espazos portuarios. A expresión correcta que debe figurar, de acordo co disposto no artigo 29.g) da Lei 6/2017, do 12 de decembro, de portos de Galicia, é delimitacións dos espazos e usos portuarios.

Por isto, facendo uso das facultades que me confiren os artigos 38, 43.3 e 44 da Lei 1/1983, do 22 de febreiro, de normas reguladoras da Xunta e da súa Presidencia, do disposto na Lei 40/2015, do 1 de outubro, de réxime xurídico do sector público, e na Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e demais disposicións de xeral aplicación,

DISPOÑO:

Artigo primeiro. Modificación do artigo 5

O número 1 do artigo 5 queda redactado como segue:

«1. Delégase nas persoas titulares da Secretaría Xeral Técnica e das direccións xerais a competencia para resolver os procedementos de axudas e subvencións que se tramiten no ámbito das súas competencias».

Artigo segundo. Modificación do artigo 10

A alínea a) do número 3 do artigo 10 queda redactada como segue:

«3. Deléganse na Presidencia da entidade pública empresarial Portos de Galicia:

a) A aprobación das delimitacións dos espazos e usos portuarios».

Disposición derradeira única. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 15 de marzo de 2022

Rosa Mª Quintana Carballo
Conselleira do Mar