Na sesión celebrada polo Xurado Provincial o día 20.12.2021 figura o seguinte acordo:
Monte Egualonga, Castelo de Gohia, Espigón, Carraceiro, Chao da Lagoa, Quintás e Estreito, da parroquia de Lousada, concello de Xermade (expediente 121_80/2019_64RV).
O 27.10.2021 tivo entrada un recurso de reposición, presentado por Teresa Reigosa e seis máis, contra o acordo do Xurado do 13.9.2021 de revisión de esbozo do monte veciñal. En síntese, manifestan que a dita revisión non se axusta ao procedemento; que hai parcelas afectadas pola revisión que son de titularidade privada e algunhas están inscritas no Rexistro da Propiedade; que de acordo coas alegacións presentadas polos recorrentes suscitáronse cuestións relativas á propiedade suficientes para poñer fin ao procedemento; que o procedemento axeitado para delimitar o monte é o deslindamento con propiedades particulares, regulado no artigo 54 da Lei 7/2012, de montes de Galicia; que a resolución do Xurado non está motivada; que na carpeta ficha da clasificación do monte indica a necesidade de realizar o deslindamento do monte; que a revisión do esbozo é unha forma velada de usurpar terreo de particulares. Solicitan a declaración de nulidade da dita resolución e se promova o procedemento de deslindamento do monte.
Examinado o devandito recurso, o Xurado, por unanimidade, acorda desestimalo, de conformidade cos fundamentos que se recollen na correspondente resolución.
Contra esta resolución, no prazo de dous meses contados desde o día seguinte ao da súa notificación ou publicación no Diario Oficial de Galicia, poderá interpoñerse recurso contencioso-administrativo perante o Xulgado do Contencioso-Administrativo de Lugo, de conformidade co artigo 46 da Lei 29/1998, do 13 de xullo, da xurisdición contencioso-administrativa.
Lugo, 17 de xaneiro de 2022
Mª Olga Iglesias Fontal
Presidenta do Xurado Provincial de Clasificación de
Montes Veciñais en Man Común de Lugo