O Pleno da Corporación Provincial, en sesión ordinaria do 29 de outubro de 2021, aceptou por unanimidade a delegación na Deputación Provincial do exercicio das competencias de recadación en vía executiva da taxa polo abastecemento de auga do Concello de Carballeda de Valdeorras (núcleos de Sobradelo e A Medua). De conformidade co disposto no artigo 7 do Real decreto lexislativo 2/2004, do 5 de marzo, polo que se aproba o texto refundido da Lei reguladora de facendas locais, e no artigo 106.3 da Lei 7/1985, do 2 de abril, reguladora das bases de réxime local, publícase o citado acordo, nos seguintes termos:
a) O contido da delegación abranguerá o exercicio de todas as facultades necesarias para realizar a recadación en vía executiva e ditar todos os actos administrativos necesarios para a xestión dos ditos procedementos, incluída a emisión da providencia de constrinximento e resolución dos recursos administrativos contra os actos de recadación executiva.
b) Para o exercicio da competencia delegada o Concello debería remitir as oportunas certificacións de descuberto do tributo a que se refire.
c) A taxa que deberá satisfacer o Concello pola prestación do servizo de recadación en período executivo será o 100 % da recarga de constrinximento que debe pagar o debedor tributario, conforme o establecido no artigo 6, alínea b), da Ordenanza fiscal reguladora da taxa pola prestación dos servizo de xestión, inspección e recadación da Deputación Provincial de Ourense. A Deputación deducirá das cantidades da transferencia do importe recadado a cantidade correspondente á taxa liquidada, sen prexuízo da notificación da dita liquidación na forma prevista no artigo 9 da Ordenanza fiscal.
d) A presente delegación estará vixente a partir do día seguinte ao da súa publicación no Boletín Oficial da provincia durante o prazo de catro anos, e prorrogarase tacitamente por períodos de catro anos se ningunha das partes mostra expresamente a súa vontade en contra, comunicándollo á outra cunha antelación non inferior a 6 meses á data sinalada ou á de calquera dos períodos de prórroga.
Ourense, 9 de novembro de 2021
José Manuel Baltar Blanco
Presidente da Deputación Provincial de Ourense