O 10 de setembro de 2021 publicouse no Diario Oficial de Galicia núm. 175 a Resolución do 2 de setembro de 2021 pola que se establecen as bases reguladoras para a concesión, en réxime de concorrencia non competitiva, de subvencións ás axencias de viaxe para o mantemento do establecemento e se anuncia a súa segunda convocatoria para o ano 2021 (código de procedemento TU983F).
As subvencións reguladas por estas bases teñen por obxecto contribuír ao desenvolvemento da actividade normal das axencias de viaxe para o ano 2021, considerando gastos subvencionables aqueles nos cales incorrese a entidade solicitante entre o 1 de xullo ata o 31 de outubro de 2021 con respecto aos gastos que deriven do mantemento do establecemento físico para a prestación do servizo.
O artigo 19.1 da referida resolución establece que a entrega da documentación xustificativa terá de prazo ata o 15 de novembro de 2021.
No presente procedemento de concesión de axudas estanse a rexistrar numerosas solicitudes de prórroga por parte das persoas beneficiarias, motivadas polas dificultades existentes para executar e xustificar os investimentos subvencionados na referida data límite, e sen que exista ademais a posibilidade de causar prexuízos a terceiras persoas.
O artigo 45.3 do Decreto 11/2009, do 8 de xaneiro, polo que se aproba o regulamento da Lei 9/2007, do 13 de xuño, de subvencións de Galicia, establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros; en consonancia co disposto, con carácter xeral, no artigo 32 da Lei 39/2015, do 1 de outubro, do procedemento administrativo común das administracións públicas, no cal se indica que a ampliación se poderá acordar de oficio ou por instancia de parte, antes do vencemento do prazo de que se trate e se as circunstancias así o aconsellan. Polo exposto,
RESOLVO:
Primeiro. Ampliar o prazo de xustificación dos proxectos presentados ao abeiro da Resolución do 2 de setembro de 2021 pola que se establecen as bases reguladoras para a concesión, en réxime de concorrencia non competitiva, de subvencións ás axencias de viaxe para o mantemento do establecemento e se anuncia a súa segunda convocatoria para o ano 2021 (código de procedemento TU983F) ao 1 de decembro de 2021.
Santiago de Compostela, 11 de novembro de 2021
A directora da Axencia Turismo de Galicia
P.S. (Decreto 196/2012, do 27 de setembro)
Emilio José de la Iglesia Lema
Xerente da Axencia Turismo de Galicia
