O 17 de febreiro de 2021, publicouse no Diario Oficial de Galicia núm. 32 a Resolución do 3 de febreiro de 2021 pola que se establecen as bases reguladoras para a concesión, en réxime de concorrencia competitiva, de subvencións a entidades organizadoras de congresos, seminarios, convencións, incentivos ou calquera outro evento relativo ao turismo de reunións en Galicia, e se procede á súa convocatoria para os anos 2021 e 2022, que serán susceptibles de financiamento no marco do eixe REACT-UE do programa operativo Feder Galicia 2014-2020 (código de procedemento TU403A).
A dita resolución ten por obxecto fixar as bases reguladoras e a convocatoria das subvencións, en réxime de concorrencia competitiva, a entidades promotoras de congresos, seminarios, convencións ou calquera outro evento relativo ao turismo de reunións que fomenten e promocionen a actividade congresual e que se desenvolvan no territorio da Comunidade Autónoma de Galicia.
O artigo 20.2 establece que para cobrar a subvención concedida o beneficiario disporá dos seguintes prazos:
– Se o proxecto ou actuación subvencionada se executa entre o 1 de abril de 2021 e o 31 de outubro de 2021, o prazo de xustificación rematará o 15 de novembro de 2021.
– Se o proxecto ou actuación subvencionada se executa entre o 1 de novembro de 2021 e o 31 de outubro de 2022, o prazo de xustificación rematará o 15 de novembro de 2022.
No presente procedemento de concesión de axudas estanse a rexistrar numerosas solicitudes de prórroga por parte dos beneficiarios, motivadas polas dificultades existentes para executar e xustificar os investimentos subvencionados nas referidas datas límite, debido ás restricións á mobilidade impostas como consecuencia da pandemia da COVID-19 e sen que exista ademais a posibilidade de causar prexuízos a terceiras persoas.
O artigo 45.3 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros; en consonancia co disposto, con carácter xeral, no artigo 32 da Lei 39/2015, do 1 de outubro, do procedemento administrativo común das administracións públicas, no que se indica que a ampliación poderá acordarse de oficio ou por instancia de parte, antes do vencemento do prazo de que se trate e se as circunstancias así o aconsellan.
Polo exposto,
RESOLVO:
Primeiro. Ampliar os prazos de execución e xustificación dos proxectos que, presentados ao abeiro da Resolución do 3 de febreiro de 2021 pola que se establecen as bases reguladoras para a concesión, en réxime de concorrencia competitiva, de subvencións a entidades organizadoras de congresos, seminarios, convencións, incentivos ou calquera outro evento relativo ao turismo de reunións en Galicia, e se procede á súa convocatoria para os anos 2021 e 2022, que serán susceptibles de financiamento no marco do eixe REACT-UE do programa operativo Feder Galicia 2014-2020 (código de procedemento TU403A), se executen no primeiro dos períodos previstos no artigo 20.2 da Resolución do 3 de febreiro de 2021, de xeito que:
– Se o proxecto ou actuación subvencionado se executa entre o 1 de abril de 2021 e o 30 de novembro de 2021, o prazo de xustificación finalizará o 10 de decembro de 2021.
Segundo. Modificar o prazo de execución dos proxectos que, presentados ao abeiro da Resolución do 3 de febreiro de 2021 pola que se establecen as bases reguladoras para a concesión, en réxime de concorrencia competitiva, de subvencións a entidades organizadoras de congresos, seminarios, convencións, incentivos ou calquera outro evento relativo ao turismo de reunións en Galicia, e se procede á súa convocatoria para os anos 2021 e 2022, que serán susceptibles de financiamento no marco do eixe REACT-UE do programa operativo Feder Galicia 2014-2020 (código de procedemento TU403A), se executen no segundo dos períodos previstos no artigo 20.2 da Resolución do 3 de febreiro de 2021, de xeito que:
– Se o proxecto ou actuación subvencionado se executa entre o 1 de decembro de 2021 e o 31 de outubro de 2022, o prazo de xustificación finalizará o 15 de novembro de 2022.
Santiago de Compostela, 28 de outubro de 2021
Mª Nava Castro Domínguez
Directora da Axencia Turismo de Galicia