O 29 de novembro de 2019 publicouse no Diario Oficial de Galicia núm. 228 a Resolución do 19 de novembro de 2019 pola que se establecen as bases reguladoras para a concesión, en réxime de concorrencia competitiva, de subvencións a proxectos de promoción e dinamización do Xacobeo 2021 dentro do programa O teu Xacobeo, e se procede á súa convocatoria para os anos 2020 e 2021. A devandita resolución ten por obxecto fixar as bases reguladoras e a convocatoria plurianual das subvencións, en réxime de concorrencia competitiva, a proxectos de promoción e dinamización con motivo da conmemoración do Ano Santo Xacobeo 2021 que se celebren entre o 1 de maio de 2020 e o 30 de abril de 2021, co obxectivo principal de lograr unha programación sociocultural cara ao Xacobeo 2021 para a promoción e potenciación de Galicia, así como reforzo da dimensión internacional do Camiño de Santiago e da propia Comunidade Autónoma, tales como exposicións, mostras, intervencións, exhibicións, concertos, feiras e festivais, publicacións, creacións audiovisuais, talleres, xornadas de formación, conferencias, charlas, encontros, foros, actividades deportivas dirixidas, torneos, mostras gastronómicas, catas e degustacións, actividades de formación e intercambio, e outras.

O 10 de xuño de 2020 publicouse no Diario Oficial de Galicia núm. 112 a Resolución do 4 de xuño de 2020 pola que se modifican os prazos de execución e xustificación recollidos na Resolución do 19 de novembro de 2019 pola que se establecen as bases reguladoras para a concesión, en réxime de concorrencia competitiva, de subvencións a proxectos de promoción e dinamización do Xacobeo 2021 dentro do programa O teu Xacobeo, e se procede á súa convocatoria para os anos 2020 e 2021, que dispón no seu artigo primeiro que os proxectos presentados ao abeiro da Resolución do 19 de novembro de 2019 executaranse entre o 1 de outubro de 2020 e o 30 de setembro de 2021, así como que o prazo de xustificación rematará o 15 de outubro de 2021.

Mediante o Real decreto 463/2020, do 14 de marzo, declarouse o estado de alarma para conter a propagación de infeccións causadas polo SARS-CoV-2, que foi prorrogado por Resolución do 29 de outubro de 2020, do Congreso dos Deputados, e mantivo a súa vixencia ata as 00.00 horas do día 9 de maio de 2021.

As dificultades e restricións derivadas da crise sanitaria obrigaron ao aprazamento da execución de moitas das actividades obxecto desta convocatoria, que vai dirixida ao desenvolvemento de actuacións e accións que maioritariamente implican a concentración de público nun espazo común que deben compartir, polo que se fai preciso adoptar as medidas precisas de cara a posibilitar o cumprimento dos requisitos establecidos nas correspondentes bases reguladoras por parte das persoas beneficiarias das subvencións, ampliando o prazo de execución dos proxectos imputables á anualidade 2021 ao 15 de outubro de 2021.

Polo exposto,

RESOLVO:

Primeiro. Ampliar o prazo de execución dos proxectos presentados ao abeiro da Resolución do 19 de novembro de 2019 pola que se establecen as bases reguladoras para a concesión, en réxime de concorrencia competitiva, de subvencións a proxectos de promoción e dinamización do Xacobeo 2021 dentro do programa O teu Xacobeo, e se procede á súa convocatoria para os anos 2020 e 2021 ao 15 de outubro de 2021. O prazo de xustificación rematará o 15 de outubro de 2021.

Santiago de Compostela, 29 de setembro de 2021

Mª Nava Castro Domínguez
Directora da Axencia Turismo de Galicia